巡場男：隨身攝力　Level Up！

今期巡場男就嚟到旺角電腦中心，咪以為旺電只係得電腦相關軟硬件，近年亦有好多舖頭轉賣唔同類型配件，一於幫大家搜羅很意又實用嘅配件。

ZTYLUS RV-L1 自拍必備

好多女士都鍾意隨時隨地Selfie，不過環境燈光唔夠嘅話，效果一定大打折扣。一樓有售呢款LED RING LIGHT就可以幫大家隨時補光，環狀光源夠晒平均，而且仲附送唔同顏色嘅柔光膠片，方便唔同環境使用。RV-L1賣HK$380，要留意係一定要搭配ZTYLUS專用手機殼先用到！

OKAA Life 360 Cam 玩味360

近年好流行玩360影片，可惜可以拍攝360影片嘅裝置又寥寥可數。呢款OKAA Life 360 Cam就備有兩枝f 2.0大光圈鏡頭，可以合成出每秒30格、1,920x960解像度嘅影片，並提供全景360、魚眼、VR等觀看模式，超好玩。三樓舖頭賣HK$1,780，食下熱潮一玩無妨。

Kodak PixPro SL25 加強攝力

手機嘅拍攝能力雖然愈嚟愈強，但同傳統相機始終有差距，想加強攝力，不妨考慮一下Kodak PixPro SL25。呢個鏡頭型相機備有1,635萬像素感光元件，勁在支援24mm廣角之餘，仲提供25倍變焦，去到600mm焦距，加上備有光學防手震系統，功能極強。用法方面，用Wi-Fi將鏡頭與手機配對後就可以於手機取景或遙控拍攝。三樓舖頭賣HK$1,650，據講銷情唔錯。

Asus Reco Smart 多功能鏡頭

同樣係鏡頭型產品，Reco Smart就更難界定佢嘅定位。備有f 1.8大光圈、150度廣角鐘頭，可拍攝出全高清影片，亦內置電池方便攜帶使用，加上拍照、縮時攝影、連拍模式，與一般相機無異。另一方面又可以當車Cam使用GPS、停車監控模式、嫛緊急檔案備份亦有齊，可以話係一物幾用。三樓舖頭定價HK$1,480，一物幾用都抵買。