電玩名師出手 VF-1型格新Look

20170305
東網電視
更多新聞短片
以河森老師嘅VF-1S為藍本,加入Tung氏嘅個人風格,感覺上與現實更加接近。

提起Macross,大家一定諗起河森正治,佢喺機械設計上嘅功力固然係超凡入聖,不過正所謂高手在民間,其實有唔少菜粉高手,發掘出河森嘅原設潛力,變成既有個人風格,又令同好直豎姆指嘅二次創作。

好似馬來西亞嘅Emerson Tung,最近就以VF-1S與VF-1D為藍本,化為個人插畫嘅新題材。三張插畫都選擇咗Gerwalk形態,機翼表面多咗美國空軍標誌之餘,底部多咗動畫中未有出現,而現實世界中屬於空軍常規武器嘅集束火箭發射器,最特別係機身多處嘅機械細節,由密封改為外露,包括肩、手肘與足踝,成為Tung氏Macross版本嘅最大特色,將原有機設與個人風格完美融合,相信各位菜迷都會心心眼吧,小編甚至想有模型版本推出呢(雖然機會微乎其微)!

Emerson Tung有咁高功力,原來佢並非泛泛之輩,呢位Concept Artist與Mecha Designer,曾經參與多款電玩大作嘅機設項目,當中包括《Angry Birds Go!Transformers》與《Warmachines Tactics》,而且長期主理《Doom》系列至今。工餘時,就會將個人喜歡嘅機械題材,甚至自創項目,炮製過多幅精彩插畫,作為科幻迷,尤其是機械人發燒友,記緊到佢嘅個人網站(http://www.emersontung.com)或Twitter(https://twitter.com/emersontung)開開眼界了。