日夜Fire！　軍艦模型App

雖然人數已經不及當年，不過軍艦模型迷依然不乏Die Hard粉絲，但係無論技術再高，就算用埋水晶膠做海洋場景，軍艦模型依然屬於靜態展品（遙控類別另計），點先可以突破框框，又唔會失去靜態模型追求嘅精密、像真等傳統作風？

日本就有一位軍艦模型高手，唔只砌模型叻，就連影相，甚至開發app都一樣了得。話說島田扣身啱啱開發咗一個專為軍艦模型而設嘅App，對應比例1/3,000，簡單嚟講，呢個App可以轉換screensaver，將戰艦模型放上屏幕表面，戰艦旁邊就會出現流動嘅波浪影像，做到航行中嘅模樣，玩家又可選擇唔同嘅海洋戰場，海水顏色會隨之改變，又可進入砲戰模式，屆時屏幕就會出現炮火，仲有日戰與夜戰選擇，將靜態模型帶入前所未有嘅新玩法，有粉絲甚至提出，如果改用平板電腦嘅話，是否可以改用較大比例嘅模型呢？

睇片就好過癮，不過模型迷想玩埋一份嘅話，仲要等多一陣，事關呢關App仲係試驗階段，尚未正式推出，而且島田先生現正同模型公司商討合作之中，事成嘅話就可大大加強互動性，加上目前只有iPhone，未有Android版本。不過無論如何，呢個App似乎對軍事模型發展帶嚟好大啟示，小編覺得戰機模型都可以效法喎，成事的話，會否為沉寂多時嘅軍事模型帶嚟第二春呢？Anyway，欲知最新進展嘅話，大家可到島田先生嘅Twitter帳戶跟進（https://twitter.com/ngshimada）。