PowerPoint職場5招　簡報快靚正

唔少上班族經常都會用到Excel、Word，事實上PowerPoint（PPT）的應用性同樣咁高，例如商業演講、學生功課經常都會用到，縱使PPT好多人都識用，但做到快靚正就唔係人人都曉，學識以下5招PPT秘技，保證極速完成有得抖。

第一招：極速複製

製作PPT好多時都會將圖像剪剪貼貼，以神技「Ctrl+C」、「Ctrl+V」進行複製和貼，再用滑鼠把圖像拉到想擺放的位置，你以為已經好快，其實做多了步驟。事實上只要點一下圖像，再按住「Ctrl」，再拖曳滑鼠，即可把複製圖像拉到合適位置，輕易做到無限複製，比神技更神。

第二招：大細階切換

相信好多人為免打錯字，打字時都係低耷耷望住個Keyboard，而唔係睇實屏幕，雖然咁打比較少出錯，但係好多時都忽略了轉換大細階，到最後又要重新打過。遇上以上情況又唔需要咁愁，皆因只要點選想轉換的字句，再按下「Shift+F3」，就可以將字句變為全大階、全細階、字頭大階，幫你慳番唔少時間。

第三招：複製格式設定

好睇耐看的PPT，除了要有豐富的圖像充撐頁面，文字亦相當重要，不過要一口氣做十幾廿頁PPT，文字格式難免會重用又重用，想快速將格式複製，可按下「Ctrl+Shift+C」，再按下「Ctrl+Shift+V」貼上格式，唔需要每次都重新設定。複製格式設定唔單止適用於文字，就連圖形格式都複製得到，方便大家批量製作。

第四招：組成群組

好多時我們會花很多心機，將多個圖案、圖片等堆砌出理想的版面，但由於版面是由多個碎片組成，所以移動時會散開一塊塊，我們可以用滑鼠一次過將它們全部選擇起來，然後按「Ctrl+G」就會變成一組圖，移動起來變得更方便，甚至可另存為圖片。如果需要解除群組，則可按「Ctrl+Shift+G」把組圖變回零碎的圖案或圖片。

第五招：壓縮圖片

畢竟PPT經常都會使用海量的圖片，若然圖片的解像度很高的話，PPT的檔案大小自然會大幅增加，檔案太大就不利於使用電子郵件傳送。就以《PowerPoint 2016》示範，點選上方欄目有一項「壓縮圖片」，並在解析度選擇「電子郵件（96ppi）」，而且不要剔取「只套用到此圖片」，就會為PPT內所有圖片進行大幅壓縮，以便用傳送或共用，唔需要再用USB傳送咁冇效率。