是日本性：那些熟口熟面的AV場景……

啲人成日話電視劇同電影嘅場景，用嚟用去都係嗰幾個，只係其實喺日本AV中，亦有唔少熟口熟面，好似位於栃木縣那須塩原市嘅「不動之湯」就係其中之一。不過講到熟口熟面嘅AV場景，其實又點止得呢個溫泉，部分仲可以租用嚟拍嘢添……嗱！拍乜嘢就自己諗啦！

人氣第一：那個泳池

呢個泳池不論係AV迷，都一定會見過佢，名副其實係AV中嘅第一場景！「那個泳池」（あのプール）真名叫做「例之泳池」（例のプール），而「那個泳池」則係日本攝影界中對佢嘅暱稱。「那個泳池」位於日本東京都新宿區一棟商業大廈9樓嘅片場「Hanazono Room」內，並有日本片場管理及營運公司「pstudio」所擁有。由於佢不但係個溫水室內泳池關係，故此不論係任何天氣下拍攝都唔會影響進度，加上可開閉式玻璃幕頂設計，採光完全唔係問題關係之餘，長達6.6米，闊達3.2米嘅泳池活動範圍亦相當高，最重要係佢交通相當便利，而租金亦唔貴，6小時租用費不過120,000日圓（約HK$8,400），故此深受AV片廠嘅歡迎。不過佢並非一開始就用嚟拍攝AV，而係供一般攝影之用，特攝片《幪面超人》系列及電視劇奇妙物語，亦曾喺呢度演出過。不過喺2004年左右，佢先至開始被用作拍攝AV嘅場景。講番「Hanazono Room」，其實面積相當大，共分為9同10樓兩層，內裏除咗「那個泳池」外，仲設有多間睡房、客廳、賭場等主題攝影棚。

認得此籠：豐玉南Studio

拍AV最重要識得搵景，只係大家都知AV題材有咁多，好似偷情、禁室、浴室等題材都有，而有啲AV更係一套片玩盡咁多個場景，對於資金有限嘅AV片廠嚟講，點可能租用多個場地呢？唔緊要，有個人氣片場可以一次過滿足晒佢哋嘅要求，佢就係位於東京練馬區豐玉南嘅「豐玉南Studio」（豊玉南スタジオ）。呢個場地係日本片場管理公司「木下Studio」旗下嘅片場之一，而佢賣點就係夠大！設喺兩層獨立屋內，一樓係最為人所熟知，經常喺禁系及凌辱系AV上見到嘅「牢屋」，亦即係監倉，另外仲有風呂浴室、廚房及睡房。二樓則係經常被人用嚟拍攝癡女系列嘅男性大型廁所及多個主題睡房。此外，Studio仲可以因應拍攝方要求，為對方加添唔同嘅陳設，由於佢有大量窗戶，故此採光相當好。不過對於AV片廠嚟講，最好嘅地方莫過於係獨立屋，就算佢哋幾點拍同拍到幾夜，都唔使擔心會畀人投訴。事實上，佢除咗經常被用作拍AV外，亦有唔少水着女優會喺度影寫真。如果心郁郁想試下喺度影嘢嘅話，究竟佢收點計呢？佢最低消費為12小時105,000日圓（約HK$7,350），計落唔算貴。

便利慾店：Plane Mart

有間便利店經常喺AV中出現，同時亦係男女優激戰嘅性地，曾有人問過日本邊間便利店咁大方，竟然肯畀人租嚟拍AV。呢間便利店個名其實叫做「Plane Mart」，只係現實中並唔存在。唔存在，因為佢係間假便利店，係日本片場營運公司「planear」旗下，位於東京都板橋區「環七Multi Studio」（環七マルチスタジオ）嘅片場一樓嘅場景。雖然佢係場景，但做得相當迫真，有齊貨架、冷凍櫃，而架上同櫃內更係擺放晒食物同飲料，簡直係真實到爆！其實呢啲食品都係吉盒同假飲料嚟，如果大家細心啲睇嘅話，會發現不論係橙汁定綠茶，飲料嘅顏色都係一樣。不過講到真，店內嘅櫃員機就真係夠晒真，成個操控介面同真實嘅一模一樣，惟獨冇錢吐出嚟。此外，片場仲會提供店員制服，分為橙同藍色兩種，真係夠晒貼心！成棟「環七Multi Studio」連埋地牢共5層，除咗便利店，仲有辦公室、酒吧、睡房及一個極大嘅天台。話時話，想喺佢嘅便利店自製作品，究竟場租金係幾多呢？原來按片場規定，大家要連埋地牢一齊租用，而價錢係12小時150,000日圓（約HK$10,500）。雖然好似幾貴，但邊個叫呢種便利店僅此一間呢？

同一屋簷：sister上鷺宮

如果鍾意睇人妻、禁斷呢啲AV嘅話，就會認得呢間和味十足嘅日式房屋！皆因佢出場嘅次數相當多，只係大家唔好以為呢間屋係布景嚟，皆因佢的的確確係一間獨立屋，而呢間住家片場嘅名字叫做「sister上鷺宮」。位於東京中野區上鷺宮嘅佢，其實係日本片場營運公司「Studio Jill」旗下，多間獨立屋式片場嘅其中一間。早喺10幾年前，佢就經常被用嚟拍攝AV，雖然曾經多次被翻新，但仍然保留昭和時期嘅味道。兩層式構造嘅佢，一樓設有客廳、開放式廚房、廁房、浴室及洗衣房，而二樓設有客廳及兩間和室，另外仲有一間睡房、廁所同浴室。佢仲有一個和風設計嘅花園，空間夠晒闊落，確實方便拍攝。不過因為佢位於住宅區，加上真係一間住得人嘅屋嚟關係，故此收費一啲都唔平。逐個鐘嚟計，每小時租金從23,000日圓（約HK$1,610）起，如果要拍12個鐘嘅話，要接近2萬港紙㗎！此外，電同水費亦係另計，難怪只有S1呢啲大型AV片廠租得起。

唔租片場得唔得？

唔租片場嘅話梗係得啦！事實上有啲AV片廠會租用民用地方嚟拍攝，尤其係當拍攝一啲同居酒屋、快餐店、理髮店有關嘅題材時，佢哋亦會租用真正嘅商舖，以達到真實感。不過租用呢啲場地嘅話，第一租金會貴啲，第二係時間要控制得好，否則隨時會「Out筆」。另一方面，對商舖嚟講唔一定會有宣傳作用，反而會帶嚟風險，好似日本有間經常被人用嚟拍AV嘅居酒屋，畀人起底之餘仲要畀人彈佢個環境其實勁污糟，咁就真係得不嘗失。