Gimmick露兩手　超合金多啦A夢預告

多啦A夢出超合金？小編記得，2006年嘅事啦，將百寶袋變成扭蛋機咁款，隔咗咁耐，唔通今年有復刻版？非也非也，係100%重頭設計嘅新版本！tamashii.jp網站最近宣布，新版本嘅最大賣點在於雙手機關，扭動左手嘅話，眼神就會隨機變化，好似拉老虎機咁樣，如果喺頭頂加上竹蜻蜓，後者仲會同步轉動，至於眼神款式就有五款，例如正常、開心、憤怒等等；右手亦有好把戲，郁一郁，就會由體內取出空氣炮與放大縮小槍等合共八款小道具。有Gimmick之餘，賣相方面亦「還原」度高冇崩壞，作為多啦A夢嘅死忠，預咗九月進貢啦，建議零售價為7,400日圓。

新版超合金要等到九月開售，不過想食多啦A夢大餐嘅話，唔只唔使等，仲要快！因應早前《大雄的南極大冒險》喺日本上畫，東京晴空塔下就有期間限定嘅多啦A夢KACHI KOCHI Café，唔只四周布置與Menu都有相應設計，當然唔少得形形色色嘅多啦A夢美食與飲品，包括咖喱飯、漢堡飽、拉花咖啡、甜品與刨冰等，好唔好食就要試過先知，不過款款都有多啦A夢嘅招牌Look，未食已經甜入心啦！話明係期間限定，咁又開到何時何日？Last Day就係今年5月7日，即將去東京旅行，甚至依家已經身處當地嘅朋友，把握時間朝聖了！