MG ZZ 2.0　靜岡現身預告

過年前，小編已經預告，被視為2.0嘅MG ZZ Gundam Ver.Ka將於今年推出，傳咗咁耐，到底幾時有試辦現身？快了快了，本月中就有分曉。Bandai剛剛喺網上公布，本月11至14日嘅第56屆靜岡模型展，就會係MG ZZ Gundam Ver.Ka嘅首展禮。到底真身靚唔靚仔，仲要等多唔夠一個禮拜先知，不過從已公布嘅未上色試辦圖片嚟睇，結構上令人高度期待，例如舊版肩甲阻礙活動嘅問題，似乎Ver.Ka已經搵到解決方法，就係延伸關節，而且精密度遠勝舊版，多咗刻線之餘，變成MA形態時當做機翼嘅盾牌，尾部加設襟翼，除此之外，背包頂部嘅一對飛彈格納庫，發射時可以向上升起，而雷射槍與MA機頭嘅連接位亦有加固處理……正所謂十年人事幾番新，何況舊版MG ZZ Gundam已經係1999年嘅產物，等足18年，希望B記今次真係全力以赴啦！

作為模型界大Show嘅靜岡模型展，參展單位又點只Bandai？長谷川（Hasegawa）今期亦喺官網發布參展資訊，以科幻類別為例，最受注目嘅當然係《超時空要塞Delta》VF-31J Fighter Mode，比例1/72，廠方標明係「完全新金型」，即係專誠開新模，似乎誠意可嘉，而據官圖可見，駕駛艙有單、雙座選擇外，進氣口亦可選開、闔形態，推進器就可上下擺動，到底實物能否100%實現，有待正式開Show再見分曉。

資料來源︰