打造型男　春夏配飾Hot Picks

「魔鬼在細節裏」呢句說話對於時裝人應該有最深刻體會，皆因時裝潮流每季都總有大旋律，大家緊貼時裝走勢自不然造型配襯都差不多，要從你我他中突圍而出，身上配飾自然就是決勝分，同時此細節位更往往成為個人配搭技巧高低優劣指標，所以配飾單品入手同樣唔可以鬆懈。是次《東網生活》就為一眾品味男士挑選多款鞋履、袋款、帽款及太陽眼鏡等等配飾，好讓你更輕易配襯出你心目中的完美造型。

觀音頭掃把腳絕對係襯衫大忌，縱然你身上着到靚一靚，但如果下身配搭對鞋「出咗事」，一樣難逃「時裝車禍」污名，所以襯啱靚鞋其實係相當緊要。意大利鞋履品牌Sutor Mantellassi 1912年創立至今堅持以人手縫製鞋履，品牌所推出的皮鞋鞋底更會採用藍底設計，以表示鞋款尊貴猶如歐洲貴族，今季品牌更特別推出適合配襯休閒造型的Moccasins及Sneakers鞋款。波鞋款方面，Common Projects及RICK OWENS相信仍然係不少人最穩膽之選，前者一對「Achilles」鞋款憑着修長剪裁及鞋側金色數字早已橫行Hi-End Sneakers多時，而後者與adidas Originals攜手合作的聯名鞋款「Level Runner」亦繼續以不死黑白配色俘虜愛波鞋的時裝友。

除咗女人喜歡買手袋之外，其實大部男士都一樣鍾意買袋，不過通常都係離不開Clutch及Backpack，前者為方便，後者為容量，當中THOM BROWNE及Christian Louboutin無疑就係呢兩個界別最受歡迎之品牌，今季「湯先生」除了繼續大玩紅白藍法國國旗圖案之外，更將螃蟹及郵輪等等海洋元素融入袋款令設計洋溢出度假氣息。Christian Louboutin就同ALEXANDER WANG一樣利用最簡潔線條配合上乘皮革，打造出容量極高的皮革背囊款式。與此同時，法國帽牌Maison Michel及英國前衞眼鏡品牌Linda Farrows同樣是夏日配飾最強之選，等你就算炎夏當前，一樣可以保持最佳造型示人。