雨季靚鞋護理有辦法

其實喺香港地要做個Sneakerhead真係好陰功，春天懶啲做少啲防潮抽濕又驚對鞋發霉，到夏天雨季殺到仲慘，基本上啲網面或者近年大熱的織面波鞋都唔着得出街，而麖皮同全白波鞋就更加係雨天大敵，遇着突然其來的驟雨，真係隨時同心愛波鞋講Bye Bye。雖然近年坊間都有好多洗鞋神器湧現，呢個品牌標榜純天然，嗰個又話自己潔力驚人，但你一日唔整污糟對鞋攞去洗一次，你一日都唔會知道佢講嘅係咪真？仲要係你有心機有時間有陽光（呢樣先最難預計）三者兼得先可以進行，對於秒秒鐘幾十萬上落嘅香港人嚟講真係有多少難度。

計我話與其等對鞋污糟先攞去洗，點解唔行多步？預防勝於治療，一早幫對鞋噴定防水防污噴霧，咁樣就可以大大減低對鞋被雨水、污水或者汁液沾污嘅機會，雖然普遍呢類防水噴霧售價都會比洗鞋產品為高，但時間等於金錢情況下，兩者其實係無分別，而且方便程度前者更勝後者。又如果唔好彩啲白色波鞋擺得耐氧化變黃都唔使擔心，坊間亦有不少美白中底的產品推出，今次《東網生活》就連同一系列最大熱的防水噴霧同你介紹，等你為鞋櫃啲靚波鞋做足準備，就算落大雨一樣可以照樣着出街！