今日係……冰島共和國成立日

冰島係北大西洋中其中一個島國，位處於北大西洋和北冰洋嘅交匯處，國土面積為10.3萬平方公里，人口約為32萬，係歐洲人口密度最小嘅國家，同時亦係世界人口密度最少嘅其中一個國家。冰島嘅首都就係雷克雅維克，為冰島最大城市。冰島先後被挪威和丹麥統治過，經過幾次主權移交之後，喺1944年6月17日冰島共和國宣告成立。

冰島位處大西洋中洋脊上面，係一個多火山、地質活動頻繁嘅國家，共有火山200至300座，當中更有40至50座屬於活火山。亦因為咁，火山探險就成為冰島旅遊常見嘅活動之一，知名小說《地心歷險記》作家朱爾凡爾納喺小說當中，就將冰島其中一個火山口描寫成可以通往地心嘅入口喇。提到冰島旅遊活動，當然亦不能不提觀賞北極光，而最佳觀賞時間就係10月至3月，由於冰島整個國家都喺極光帶上面，所以全國上下任何地方都有機會欣賞到極光。

要欣賞到極光，一定要喺漆黑嘅晚上進行，而冰島嘅夏季日照時間極長，日照時間平均每日有22小時，可以話幾乎唔會察覺到日落，港產電影《辣手神探》當中，飾演臥底江浪嘅梁朝偉表示其理想就係移民冰島，正係因為希望可以長時間享受日光。不過，睇嚟佢喺冬季就要飛到其他國家，因為冰島嘅冬季平均只有約4小時日照時間。