夏至精讀　芭蕉扇五大選購應用貼士

唔經唔覺聽日就係「夏至」，亦即一年中白晝最長的一天，來到這個時間，天氣好似零舍熱！雖然曾有專欄作家講過，夏天拎電風扇出街就係廢青，但你熱死係你嘅事，唔想中暑都係買番把芭蕉扇穩陣！今次就教大家揀把好嘅芭蕉扇，兼傳授大家使用貼士，學識後呢個夏天就幾時都涼浸浸啦！

認清四大型號

目前共田芭蕉扇共有四大型號，「暴風版」F95B已有一定歷史，採用7W功率輸出，扇葉約100mm闊，同時機身只有190g重，手掌咁大容易攜帶。GT532是「加大版」，扇葉由4片加到7片，直徑130mm，配合18V磨打及四段風力調校，整體風力要大得多。F9及F10均是今年新款，前者是「摺疊版」，背後手柄可以打開，用以手持或座枱擺放；F10則是「夾拆卸版」，配備360度旋轉支架，可夾於辦公室、BB椅等不同位置。惟留意F9及F10輸出都只有4.5W，要預咗無另外兩款咁好風力！

Logo分辨真假

揀咗型號就要分㸤真假，以免買到冒牌貨。最易睇是正面Logo，正版白底紅扇，白色貼近乳白色，右上角附設（R）Copyright標誌；假貨Logo無咁白，較容易發黃，部分更是貼紙，用得耐會翹起。拆開電池蓋後，正版電池顏色是特有淡藍色，上面以繁體中文寫上「共田（R）風扇專用電池」，而且所用的18650鋰電池容積劃一為2,200mAh，標示其他容積如4,800mAh均為假貨。另外，共田官網亦有指，新版電池倉及扇葉中央均印有芭蕉扇Logo，假貨並沒有。

不要拆走電池

驗明正身後，一些安全用法也要知，過往就曾發生芭蕉扇懷疑使用劣質電池，或充電時電池過熱而着火爆炸的意外。想用得安全，應避免通宵充電或邊充電邊開風扇；亦盡量不要拆走電池，拔出後重裝也要留意正負極方向。雖然更換大容量鋰電池可以延長使用時間，但此舉容易影響原生的短路保護系統，不建議更換。針對長髮女士，頭髮有可能捲入風扇內部，所以用時也應捲起頭髮。另外，部分網友指開住風扇噴水會更涼快，但一旦有水流入摩打或電池就有機會短路，也容易令用家觸電，所以不要貪涼而冒險了！

放紙巾防震動

雖然不建議更換電池，但其實也有高階玩法。後座力強是芭蕉扇共通點，使用時容易震動甚至往後移，但只要放張紙巾係風扇底，又或貼上防滑膠貼，就可大大減低震動幅度。另外，國內製品良莠不齊，扇葉重量可能不一，導致風力不平衡；改善方法是找出最輕的一塊扇葉並貼上膠紙，這樣便可以提升平衡度，加強風力減少震動了。如果想再涼快感一點，可在風扇網罩塗上一點清涼油，令它送風時更涼爽兼發出清香。

避免兜頭直吹

最後提提大家，雖然俗語有云「冷從腳冷，熱從頭熱」，風扇對頭吹固然涼爽，但吹得耐容易引致風濕性頭痛，直吹喉嚨位置也容易出現痕癢或咳嗽，所以夏天無論幾熱，都盡量不要對着頭部或喉嚨直吹，亦不要吹太長時間。每次吹風扇的理想約為半小時至1小時，風力以柔和為佳。另外，由於熱空氣向上升，冷空氣向下降，所以只要把風扇放兩旁再以45度向上吹，就能帶動空氣循環，最健康亦最涼快。