哆啦A夢捱義氣　串起老友記

無論睇漫畫或者動畫，都會戥哆啦A夢慘，次次大雄搞出大頭佛都要佢執手尾，有時仲要幫埋胖虎、小夫與靜香，識分身都唔掂啦！啱啱喺日本推出、由GASHAPON製作嘅新扭蛋，又要旨意晒哆啦A夢了。這套新品名為「つまんでつなげてますこっと」，全套10款，不過角色只有5個，分別係哆啦A夢、大雄、胖虎、小夫與靜香，分別之處係背脊加咗鍊子或者勾扣，玩法好簡單，就係將以上扭蛋Figure用鍊子或者勾扣打直串起，就可變成哆啦A夢「串起」成班老友記飛上天嘅有趣情景，點解一定要勞煩哆啦A夢？因為5個角色Figure之中，只有佢戴咗竹蜻蜓、得佢識得飛嘛！睇見佢咁辛苦都仲識得笑，果然夠老友、夠義氣，唔怪得「誰都喜歡你，小貓也自豪」！

除咗扭蛋，哆啦A夢喺日本航空界都有新搞作。話說去年係哆啦A夢30周年，日本航空（JAL）就推出咗「哆啦A夢不銹鋼暖水壺」，早前JAL宣布推出第二彈，只限日本國內線嘅「JAL Shop」限量開售。第二彈嘅功能與尺寸不變，不過表面換上全新設計嘅哆啦A夢彩繪，可惜入手難度極高，第一彈甫推出已被秘殺，就算係神通廣大嘅香港水貨商，以小編所知都冇乜人入到貨，相信第二彈嘅輸港機會都係微乎其微，若然你今期會去日本旅行，又咁啱坐JAL嘅話，或者仲有少少機會，祝君好運！