電玩吹兩嘴:VR結婚 新娘係綿花糖!?

20170708
東網電視
更多新聞短片
電玩吹兩嘴:VR結婚 新娘係綿花糖!?

嘩!宅男喜訊呀!日本之前有忠實玩家試過同N3DS遊戲裏面嘅虛擬女友情訂終生舉行婚禮啦,但今次仲激,居然別開生面搞咗場「VR結婚式」!仲可以同二次元角色所扮演嘅新娘「親親」呢!連電‧競女網上「觀禮」完都覺得,宅男嘅人生真係唔等於「零」嘅!

日本hibiki works推出的成人向美少女AVG遊戲《新妻LOVELY×CATION》,官方日前就為遊戲宣傳而推出粉絲抽選活動,當選的玩家被安排到位於東京品川天王洲一間高級婚禮舉行場地,跟遊戲中3位女主角阿雪、乃乃和愛子,舉行一場簡單而隆重的VR婚禮。現場只見粉絲配戴虛擬眼罩,新娘阿雪即時就在眼前,仲有貌似安西教練的神父作見證呢!好喇,到咗壓軸「親親」環節,女工作人員竟然夾住嚿「綿花糖」充當新娘嘴唇,呢一吻夠晒「爆」呀!

日版《Puzzle and Dragons》踏入5周年,繼之前大型更新釋出三人協力玩法之後,今個月終於兌現年初活動承諾,實裝「交易」功能喇!日前官方在生放送節目中介紹詳情咁話。

今次實裝的交易系統,玩家可以將手上不需要的寵跟好友同星數的寵交換。但首要開放條件是玩家等級達110級或以上,同時交易的玩家對象也同樣達110級或以上,兼且要成為好友超過30天。另外可交換寵的Monster Point一定未滿100,而且僅限於玩家遭遇過的角色。交易設定當中,玩家最多可揀選5隻想要的角色,再由對方從中擇一選擇,公布交易期限為7天,而每次交易需花費10萬金幣。電‧競女聽落都好似幾吸引,不過魔鬼在細節中,官方最後補多句會調整部分寵物的星數及MP值,希望唔會令交易功能增加難度啦。

曾經在家用機和手提機大熱的《全民哥爾夫》,終於要推出手遊版本喇!遊戲已即日起在日本App Store和Google Play免費下載。如果大家有玩開釣魚、保齡球呢一類靠指尖拖拉操作的運動消閒遊戲,相信今次介紹的手遊版《全民哥爾夫》必定會一試上手喇。基本上玩家所有揮桿都可以單手指尖上完成,當然球洞環境也會加插風向、角度等來增加難度。遊戲中玩家可以到訪全世界不同著名賽道,除了單人挑戰外還可以邀請最多8位選手對賽。另外玩家可透過轉蛋收集道具自訂角色造型,又有育成元素,相信粉絲會玩唔停手呀。