多啦A夢出場　氹女生砌模型

睇嚟「B記」Bandai真係好有決心，打破「模型係巴打專利」呢個成見，繼早前嘅HACO ROOM「小熊學校」系列，出開《Dragon Ball Z》嘅Figure-riseMechanics，亦將會喺11月首度推出多啦A夢與多啦美。其實超合金與Robot魂都出過多啦A夢，何解要多埋模型版本？答案，兩個字︰內構！

Figure-riseMechanics多啦A夢與多啦美，都用上類似GUNPLA嘅設計，既有還原度高嘅外形組件，仲有內部骨架，而且分件清清楚楚，頭部、眼睛、嘴巴、軀幹與四肢都係獨立組件之餘，表面又有細緻嘅機械紋理，不過你可能會問，冚埋外殼，裏面有幾精細都睇唔到啦！所以隨盒另備一套透明外殼，唔會浪費咗廠方嘅精心設計，以及你嘅一番心機，至於同系嘅多啦美亦用上相同設計，就連後尾枕嘅蝴蝶結都Show到機械內構，係抵讚、抵Like嘅！有Gimmick之餘，呢兩款新模型又唔算貴，各售2,500日圓，同GUNPLA HG類別差唔多啫！好玩、賣萌、易組裝，加上入手難度低，想氹女生都成為模型愛好者，唔難，最緊要男友/老公識做，到時唔係要開到聲先識送畀另一半啩？