認樣即飛 Hover Camera Passport

20171121
東網電視
更多新聞短片
自拍時舉起「V字手勢」,無人機就會倒數兼影相,自拍不求手。

近期科技產品都玩認樣,就好似iPhone X靠個樣就可以解鎖,而全新Hover Camera Passport四軸無人機,就能夠透過面孔識別技術,Lock實用家個樣自動尋找和追蹤,打造屬於你的隨身攝影師,玩自拍一流,加上部機摺得埋,叫做Passport實在當之無愧。

今次Passport跟機就冇遙控器,而係透過Wi-Fi連接《Hover Camera》手機App,內裏更提供8種模式選擇,包括主人、飛行、合照、俯角拍攝、慢跑、騎乘、環繞和全景,當中主人模式就要事先透過手機鏡頭記錄用家個樣,並會自動上載到無人機,之後徒手放機就會全程追蹤你個樣,呢個時間只要舉起「V字手勢」就會進行倒數3秒自拍,再做「OK手勢」就會結束臉部追蹤。App唔單只提供虛擬控杆操作,甚至乎支援即時編輯影片和相片功能。

現時大部分無人機都採用摺疊式設計,將軸臂和槳翼摺疊收埋,不過槳翼被碳纖面板和邊框包裹的Passport,其摺合式機身就唔一樣,原理就好似本書咁翻開和對摺,收納後體積僅有18.2x13.2x3.3mm,而且有磁石吸實,所以不會輕易翻開,所以玩得夠安全。Passport本身冇一鍵起飛功能,只要開啟引擎,然後放手,無人機就會透過超聲波和光流感應器,進行懸停和定高,因此無論在室內抑或戶外,實試在戶外環境都唔會飄來飄去,每粒電池大概玩到10分鐘左右,續航力一般,所以跟機有兩粒電池畀大家。

畢竟玩航拍好多人都會着重拍攝質素,而Passport的鏡頭就提供78.4°視角,並支援4K@30fps拍片和1,300萬像素影相,而4K拍片固然需要較大記憶體,而機體本身配備32GB內存,毋須插記憶卡即可記錄1小時的4K影片和1萬張相片。值得一提的是,Passport當使用面孔識別功能時,鏡頭便會跟住用家個樣自動上下擺動,而手機畫面則會以綠色框架圈實用家,完全唔需要手動調校鏡頭角度。