Supreme x TNF　「真‧雪山褸」現身

如果閣下係Supreme Fans的話，除了最期待Supreme x Nike會出咩款聯名波鞋之外， Supreme x The North Face呢個王牌級聯名系列相信大家同樣好關心。兩個品牌自2007年春夏季度合作過後，差不多每季都必定有聯名系列推出早已成慣例（07秋冬、09春夏及秋冬3季無出），當中所包括的衫褲背囊小物其實都只可以算係伴碟，只夠攝牙罅，令大家流晒口水嘅主菜，當然係各款採用搶眼圖案打造的Mountain Parka及Nuptse Jacket（Down Jacket）。雖然上個月先推出咗皮革版Nuptse Jacket、袋款及手套，但係Supreme Fans都知早早就有諜照（定公關伎倆？）流出嘅「真‧雪山褸」尚未現身。

日前品牌就正式宣布將於11月30日（日本地區12月2日）推出呢個採用雪山圖案作主題的Supreme x The North Face聯名系列，當中Mountain Parka及Baltoro Jacket（Down Jacket）兩款設計，就將雪山圖案以Full Print手法完完整整運用到外套之上，真係睇相都覺得凍，仲邊使上雪山！如果你有儲開以往兩牌聯手打造嘅地圖褸、腰果花褸及樹葉迷彩褸等等設計，今季呢款咁有冬天Feel嘅雪山褸又點可以冇？今個系列仲有推出Crewneck Sweatshirt、T-Shirt及6-Panel Hat，雖然座雪山細咗少少，但價錢肯定易入口得多，另Expedition Backpack及Nuptse Blanket相信都會好受歡迎，尤其是後者冬天用嚟當被用一流，望穿秋水等咁耐，至少都要入番一件半件先對自己有啲交代。