元祖雷神精密回歸　1/24 Asurada GSX

提起雷神，唔只有力大無窮兼爆肌嘅Marvel版本，仲有快過風嘅Asurada，即係《高智能方程式》之中「男一」風見隼人（港譯「風見車人」）嘅戰車呀！喺整個「高智能」故事中，Asurada經過多代進化，各有捧場客，不過冇TV版嘅元祖型號Asurada GSX，又點會有後嚟愈出愈快、造型愈嚟愈流線嘅Super Asurada 01與ν-Asurada AKF-0等等後輩呢？要數出得最靚、最有誠意嘅高智能模型品牌，相信日本嘅青島模型（Aoshima）係眾望所歸吧！Aoshima將於本月推出1/24 Asurada GSX，值唔值得入手先？

高智能嘅跑車有型有款，皆因機設一環由「超時空之父」河森正治負責，Aoshima 1/24 Asurada GSX嘅最大驚喜，係喺大師傑作之下仲有突破，拉直咗大部分原本傾向弧形設計嘅車身線條，塑造出剛強新形象。除此之外，全車內外多咗唔少刻線、細線與Marking，變得更精密、更像真，情形就好似高達模型嘅HG與RG嘅分別。另一方面，Asurada GSX嘅絕招就係升壓渦，呢部新模型唔只可以將車尾嘅引擎升起，仲可以同步將水平尾翼收起，還原發動升壓渦嘅形態。至於內構方面亦都畀足誠意，車門可以打開、車殼又可拆除，show到前後軸嘅機械細節與車尾嘅引擎艙外，車廂亦有仔細布局，駕駛形態嘅隼人、「雷神」駕駛電腦與HUD抬頭顯示器統統有齊，助手席仲有大大塊嘅顯示屏與鍵盤，真心講，定價4,800日圓，其實唔算貴。高智能鐵粉依然心裏十五、十六嘅話，可到官網（ http://www.aoshima-bk.co.jp ）睇多幾次再作決定吧！