真‧指紋解「鎖」　Bio-Key TouchLock TSA

好多人去旅行都會用行李鎖，但傳統鎖頭多數用鎖匙或密碼開鎖，鎖匙容易遺失、密碼有可能被別人撞中，不過全新Bio-Key TouchLock TSA指紋行李鎖就毋須擔心以上問題，皆因採用新穎的指紋解鎖技術，帶隻手指就可以去旅行喇。

全天候設計的TouchLock TSA，本身支援防水效能，基本水濺都頂得住，加上行李鎖簡單易用，只要按一下鎖扣，待機身的LED指示燈亮起，就可以把手指放上指紋辨識器解鎖，而最多能夠儲存20個指紋記錄，萬一手指的指紋唔清晰，都可以用另一隻手指開鎖。此外，行李鎖的支援USB充電，根據官方指每次充滿電，都能夠使用大約一年左右，換言之去旅行之前叉一叉，毋須擔心電量問題，另外亦設有一個鎖匙窿，不過就唔係畀用家開鎖，而係畀美國海關使用，換言之，美國入境都冇問題。