是日本性：雙馬尾日　性感孖辮妹

「雙馬尾」即係我哋所謂嘅孖辮，而每年呢日都被日本民間團體日本紀念日協會，定為「雙馬尾之日」。不過點解呢種本嚟常見於少女嘅髮型，點解要專門定一日出嚟做紀念日，而日本坊間又有唔少以雙馬尾為題材嘅美少女寫真呢？

雙馬尾の日謎團

日本記念日協會喺2012年時，將每年2月2日為定為「雙馬尾之日」（ツインテールの日），只係點解要定喺呢日卻係眾說紛云，有人認為同讀音有關，亦有人認為只係因為呢日易記。有見及此，日本記念日協會作出解釋，理由竟然係同日本人氣動漫《美少女戰士》有關！原來自呢套作品喺90年代中推出後深受歡迎，尤其係當中嘅孖辮女主角月野兔更係超人氣角色。為咗推廣孖辮魅力，因此佢哋揀選咗「2」呢個具有Twin意思嘅日子（因為孖辮嘅英文係Twin Tail），作為「雙馬尾之日」。不過正由於呢日嘅出現，同日本嘅ACG文化有相當關係緣故，故此每到呢日有唔少動漫同好會上載雙馬尾少女嘅人像漫畫。隨住呢日喺民間不斷普及，唔少以雙馬尾為題材亦應運而生，跟大家分享雙馬尾獨特嘅魅力。

清新味道：《晴天的雙馬尾》

日本人認為雙馬尾呢種紮頭髮方式，可以展現出少女嘅清純味，而ACG迷更視佢係萌屬性之一，因此日本寫真攝影師古谷完便創作出，呢本以美少女味道加雙馬尾為主題嘅寫真集《晴天的雙馬尾》（晴れのちツインテール）。古谷完向來對雙馬尾情有獨鍾，佢認為呢種髮型可以令女性睇起嚟更吸引，外形更有健康美同埋展現出快樂嘅精神。為咗展現出生活中，雙馬尾美女嘅吸引力，喺呢本寫真中，佢搵嚟田中里奈、佐野日向子、柚來、三戶夏萌、西萌奈香、浦谷原奈、小出友華、吉田理紗、永井亞子、宮司愛海及Chibiaya合共11位清純系美女，以唔同嘅造型展現雙馬尾嘅魅力。

百位美女：《日本雙馬尾百景》

如果覺得11位美女仲未能展現出雙馬尾魅力嘅話，呢本名為《日本雙馬尾百景》（日本ツインテール百景）嘅寫真集，絕對可以睇到大家飽飽滯滯。事關喺呢本寫真集中，雲集咗100位由日本雙馬尾協會選出嚟嘅美女，以唔同嘅服裝造型，及唔同嘅雙馬尾紮法，展現各種雙馬尾嘅萌系風情。呢百位美女中都係人氣模特兒及水着女優，身材各有睇頭，配合清新嘅氣息，係咪好滿足呢？據有份參與製作呢本寫真集嘅攝影師正司慎一郎稱，每位雙馬尾美女嘅髮型都搵嚟專業髮型師設計，並配合合適嘅服裝，同埋喺100處地方進行拍攝，以顯示出唔同環境及造型下，雙馬尾嘅魅力。另一位有份參與嘅攝影師古谷完更誇張地講：「雖然呢個世界有唔少非物質文化遺產，但要佢揀嘅話，雙馬尾一定上榜。」

孖辮機槍：《雙馬尾與機關槍》

雙馬尾同機關槍之間究竟有乜嘢關係呢？老實講，真係唔知，只係知道喺呢本名為《雙馬尾與機關槍》（ツインテールと機関銃）嘅寫真集中，佢哋搵嚟包括YURA、永井亞子、阿知波妃皇、新部宏美、松川佑依子等13位美少女，化身成手持各類輕及重機槍嘅清純美女，將暴力美學展現喺大家眼前。其實呢本寫真推出時，出版商介紹過呢本寫真嘅理念，佢哋表示透過雙馬尾呢種日常髮型，同埋機槍呢種非日常嘅武器，將可愛同暴力富有詩意地結合埋一齊，係一種展現出萌系美嘅終極形式。雖然講完之後都唔係好明，但作品推出後卻深得軍事迷嘅喜歡，認為佢具有奪走佢哋顆心嘅魅力，唔知大家又認唔認同呢？

孖得夠索：真希瀨冬月

如果要數喺日本AV界，有邊位女優係著名雙馬尾擁躉嘅話，必然係真希瀨冬月。喺1993年11月11日於日本東京出生嘅佢，喺2012年6月憑藝名「小林冬月」，以蘿莉系AV女優形象出道。2014年10月佢改以現時藝名，繼續AV演出工作。出名鍾意雙馬尾髮型嘅佢，經常喺Twitter上分享自己嘅雙馬尾自拍照，因此被人稱為「雙馬尾娘」。不過喺2016年7月14日時，佢表示為咗休養身體而暫別AV界至今。有趣嘅係雖然佢暫別AV界，卻喺風俗界相當活躍，而早前佢就位於新潟，出晒名多AV女優客串嘅出張風俗店「ROOKIE」入籍。當然，作為一位薄有名氣嘅AV女優，佢同樣係期間限定啦！