【決性11點】冷感唔多好　大食又投訴？！

討論主題：我同女友拍拖七年，性生活可謂如魚得水，女友可以話有求必應，比起好多港男都幸福好多。點知近來女友愈嚟愈大食，搞到我變咗軟腳蟹之餘，佢仲嫌我性能力差，有乜計搞搞佢呢？

還曆熟佬：你仲唔拿拿臨買定十粒八粒海狗丸呢啲補品返屋企看門口！女人嘅嘢，講到出口話你差，咁你喺床上嘅表現就一定唔掂，你女友都發出咁嚴厲嘅警告，你仲唔正視，隨時畀佢飛起，呢啲錢唔慳得㗎，老友！

M & S：我都曾經遇過類似嘅難題，當初我亦都非常苦惱，後尾畀我見識到加藤鷹嘅指技，於是我就不斷鑽研同練習，終於都練到七八分火候，而我就係憑住呢招，先將女友餵飽一半，然後先再正式進行下半場，結果成功解決分手危機，你不妨試吓！

流膿大亨：男人同女人對性嘅需求，隨年齡增長會有所不同。男人年紀大咗，雖然一樣鹹濕，但嗰度已經開始唔得，而女人就反而年紀愈大愈需索。如果你女友開到聲話你唔掂當，你除咗睇醫生之外，亦可以考慮吓用性玩具做輔助，又或者參考《格雷的五十道陰影》，玩吓SM、角色扮演啦！

直直波極：遇上呢種情況，你應該搵機會同佢坐低傾吓，講出你嘅問題，共同搵出解決方法，最重要係話畀佢知，大食唔係問題，但都要遷就一下伴侶。事關性愛係好講求雙方配合嘅事，要識得互相體諒、遷就，先可以如魚得水。如果佢唔肯聽你講，咁就冇辦法，一係分手、一係靠食春藥，不過食得太多會傷身喎！

神勇脂豬俠：難得有個咁好嘅床上對手，你應該覺得高興至係！咁到畀你遇到，真係好過好多女友近乎性冷感嘅爸打好多咯！一係咁，你唔要就我要，講吓笑！講返正題，你對手大食，咁你都要增值！首先要多做運動促進健康，二來要飲食均衡，三來可以嘗試一下學多啲花言巧語氹女友喺你門前表演自摸，等佢自己High到「衝上雲霄」，你至嚟執死雞，咁就事半功倍，慳水慳力啦！