小米 VS 360　抵玩車Cam出入平安

揸車一族想出入平安兼保障自己，係時候將車入面嗰個鬆郁朦嘅車Cam（行車記錄儀）換咗佢。今次就搵來網民評價不俗嘅小米行車記錄儀及360記錄儀，實地嚟個畫質、功能大決鬥，睇下邊部合你心水！

行貨剛剛上架的小米行車記錄儀，用上黑色長方形盒狀設計，表面就加入霧面處理，冇咁易黏灰塵、指紋；不過因為機背設有3吋大屏幕，所以機身體積就稍嫌大部。而360記錄儀，全名為360記錄儀一代升級版，機身的骰小巧，黑色拋光加銀色電鍍鏡頭，設計一般。小米行車記錄儀的安裝支架屬黏貼式，而且備有一張靜電膠片，可以將支架先黏上膠片再黏於擋風玻璃上，移位、拆除時就輕鬆得多。而360記錄儀就附送真空吸盤，簡單易用，感覺穩陣，支架更設有兩組轉軸，可以輕微調整位置。

鏡頭方面，小米備有F1.8光圈及160度廣角鏡頭，而360則備有F2.2光圈及140度廣角鏡頭，兩者同樣可以拍攝1,920x1,080影片。實測環節，日光下兩機的畫質都有驚喜，基本上毋須刻意放大已經可以睇到環境及前方車牌等細節，清晰度甚高。夜晚的畫質就難免下降，影片雜訊相對較高，而暗位細節亦有油畫化。但在時速100公里車速下，大小型路牌都可以清晰睇到；而前方車牌就需要約3、4個車位的較近距離及約時速50公里的車速下方先睇到，表現合格。至於拍攝模式，小米及360都支援循環錄影，分別會將片段剪輯成2分鐘及1分鐘；並且同樣內置緊急模式，當車Cam感應強力碰撞就會將影片儲存在獨立資料夾，防止被覆蓋。

小米及360分別備有3吋及2吋屏幕，同樣非篤芒，前者屏幕下方的4個輕觸式按鍵，後者就於屏幕右邊設有3個實體鍵。操作上就以小米秤先，皆因經將錄音、Wi-Fi、緊急錄影及設定4個常用功能設於主頁，即按即用。而360就將功能、錄音及緊急錄影設於主頁，比較常用的Wi-Fi就需要進系統設置方可開關，麻煩咗！雖然兩機都係入門級車Cam，但Wi-Fi功能一樣有齊，同樣透過車Cam發放內聯網與手機Apps連接，小米的《米家》及360的《360記錄儀》支援的功能大同小異，包括即時預覽、緊急影片及普通影片，並可以直接於App內瀏覽已拍攝影片。至於Wi-Fi下載影片，小米下載2分載片段需時1分30秒，而360下載1分載片段需時40秒，360下載速度上有輕微優勢。