赤柱半島　個半鐘速賞犀牛石

近排天氣熱咗好多，仲係腳痕想行山的話，不妨去赤柱斜炮頂會一會犀牛石，來回2公里都冇，起行啦！

犀牛石位於赤柱半島南部，乘搭新巴14號在赤柱炮台落車便可到達起點，山徑入口就在軍營閘口左邊，見到「進入營區後 限速15公里」警告牌旁的樓梯轉上去就啱架喇！

上山路徑十分清晰，不用20公鐘便到達位處177米高的山頂，見到標高柱後右轉就可通往犀牛石。沿路無官方標示，但總算有絲帶引路，只要一路朝東南方落山，其實都唔難搵。惟部分山徑是陡峭沙石路、又要作小量攀爬，對行山新手也許是個小考驗。

落犀牛石的景觀就非常開揚，大潭灣、赤柱監獄及鶴咀半島盡在眼前。位處於山腰的犀牛石，外形及紋理都非常似一頭犀牛，果真是大自然的鬼斧神工！

行完山仲可到人少清靜的聖士提反灣浸個痛快，沙灘離軍營僅20分鐘步行距離，而毗鄰的赤柱軍人墳場更被譽為全港最優美墓園，鍾意影相的朋友不妨去探索一下。在赤柱半島上，已列為歷史建築的八間屋、美利樓，以至售賣香港特色紀念品的赤柱市集都是旅遊熱點，之後再喺赤柱大街吹下海風、歎個Tea，係咪諗起都爽呢？