【決性11點】中女絲襪谷：點解Check前度？

20180519
  • 東網電視
    更多新聞短片
    【決性11點】中女絲襪谷：點解Check前度？好奇囉~~女人係咁好奇架啦~
    「有嘢想知你哋點諗？」艾美美
    「正經嘢？」Joe君
    「正經嘢我哋唔答架喎！」阿田
    「玩嘢呀！」艾美美
    「講啦~」阿田
    「其實你哋會唔會偷睇EX嘅嘢？」艾美美
    「你指同EX一齊嗰陣偷睇佢啲嘢？」阿田
    「唔係，我指依家偷偷睇EX嘅Facebook同IG呀」艾美美
    「做乜要偷偷啫？你覺得佢會企喺你後面望住你咩？」Joe君
    「妖，唔係呀~」艾美美
    「你問得就有啲嘢啦」阿田
    「即管講嚟聽吓」Joe君
    「其實呢個EX都好耐好耐無聯絡架啦，當年愛到天崩地裂，後尾愈見愈少，吖！咁就無疾而終Lu~」艾美美
    「使唔使咁可歌可泣呀，講！重！點！」Joe君
    「最近突然抽起條筯，好奇想知佢點，咪睇佢FB」艾美美
    「你發現原來佢係Gay」阿田
    「唔係呀，只係見到佢已經結咗婚生咗細路囉」艾美美
    「你好心酸咩家陣？」Joe君
    「又唔係，但心情有少少怪囉」艾美美
    「咁有咩問題先？」阿田
    「我以為隔咗咁耐會無嘢，原來又唔係，但你話我好掛住佢咩？又唔係囉」艾美美
    「阿姐，你想點呀？」Joe君
    「我咪就係想問你哋會唔會睇前度啲嘢囉，會唔會個心唔舒服？」艾美美
    「老實講，以前我分咗手都會成日check佢FB，睇下佢係咪好快有新女。」阿田
    「有又點呢？」Joe君
    「睇下係咪索過我囉。」阿田
    「索過你咪好Hurt？」艾美美
    「我使驚。」阿田
    「超~Check乜鬼，索性好似我咁」Joe君
    「點呢？」艾美美
    「唔開FB account，咁咪無眼屎乾淨盲囉」Joe君
    「呢句嘢好娘」阿田
    「係，娘到一個點」艾美美