我係「敢」煮：點揀靚金華火腿

我唔係大廚，亦無上過堂學過廚，只係由細幫手入廚煮飯，可以說係由細煮到大，兼因為做嘢接觸好多大廚，偷到唔少師，唔敢話煮餸好叻，但堅鍾意煮，又乜都敢煮敢試嘅現代港女。

－－－－－－－－－－

點揀靚金華火腿

老一輩教煲老火湯，會話落一小塊金華火腿來吊味，靚嘅金腿，真係一小塊已能添味，但品質稍次嘅，不是死鹹無甘香味之餘，仲隨時送多陣油膱味，咪搞！咁點先至叫靚嘅金華火腿呢？主要係觀其色、聞其香，以及夠唔夠乾身。

首先，火腿表面唔好有黑點，呈黃褐色或桃紅色，而脂肪部分要呈白色或微紅而富光澤；瘦肉部分則要呈深玫瑰色或桃紅色。此外，切面要夠平，聞起嚟有陣甘香臘味；最後是要夠乾身。煲湯多數會用帶骨嘅火瞳骨或火爪（原隻金華火腿下半部分），骨多肉少膠質豐富，熬出來嘅湯仲會帶點奶白色添！也有不少老一輩愛用全隻髀最靚嘅上方（或稱火塊）部位來煲湯，由於有肥有瘦又有皮，仲可以用來蒸魚、炒菜，甚至炮製成經典名菜──蜜汁火方添！