侵侵「野獸」座駕　金仔獲邀參觀2秒

有「野獸」（The Beast）稱號的美國總統座駕向來都頗為神秘，外界了解甚少，唔知侵侵係咪想展示同金仔的友好關係， 喺美朝峰會期間竟然帶金仔參觀「野獸」，金仔有機會近距離欣賞兩三秒咁多，都算係咁啦。媒體就冇咁幸運喇，攝影師只能拍攝兩人的交談情況，未有機會拍到內櫳，有趣的是兩名攝影師為爭奪理想位置竟出現肢體碰撞。

「野獸」的設計是高度機密，車內實際有啲咩亦鮮為人知。據報，此車由Cadillac Limousine改造而成，不但加入裝甲及採用防彈設計，而且有自動滅火、防生化襲擊、催淚煙及干擾彈發射器等設計，可防止飛彈襲擊。為確保總統安全，車內還儲存了與侵侵同類型的血液，以備不時之需。消息指，在新加坡見到的「野獸」是奧巴馬年代的版本，美朝峰會後很可能退役，意味侵侵不久將來有新車坐。