我係「敢」煮：一個步驟　魚湯變奶白色

我唔係大廚，亦無上過堂學過廚，只係由細幫手入廚煮飯，可以話係由細煮到大，兼因為做嘢接觸好多大廚，偷到唔少師，唔敢話煮餸好叻，但堅鍾意煮，又乜都敢煮敢試嘅現代港女。

－－－－－－－－－－－－

出街食飯柯打魚湯，那一窩湯水總是奶白色澤，見到已經覺得又甜又鮮，咪以為好難搞，其實大家都可以喺屋企做到，只要簡單做一個步驟，就係煎一煎條魚即可！

煲魚湯所用嘅魚選擇好多，如最常用嘅大眼雞（木棉魚）、梭羅魚、牛鰍、鰂魚、紅衫等，亦有很多人鍾意用一堆雜魚仔，之不過，不少人會將雜魚連內臟稍為沖一沖水後連鱗一齊放入魚袋度煲湯，問題就嚟，咁樣煲啲湯唔會變奶白之餘，又難出味，最難搞嘅係清洗魚袋，超級麻煩；就算事先煎一煎都好，成鑊魚鱗，如果煲到魚爛，有機會內臟嘅甘苦味滲到湯中，因小失大，坦白講，小妹超級唔建議咁做囉！

得到唔少大廚提點，主要留意兩點，就係魚需要事先煎一煎，同埋煲湯嘅水必須要滾起至落魚。返屋企實試過多次，認為還是以下這方法最好；先將魚處理洗淨，燒熱鑊下油下薑片（去腥味）下魚煎到7、8成熟後入魚袋。另起煲煲熱水，水滾才下魚，之後可以隨喜好下蔬菜甚至白蘿蔔等配料。

小妹平時開飯多是一個人，便將大廚貼士再Modify，仲要原條魚用晒唔好嘥。首先將一條魚（自問愛滑口又怕骨，多選桂花）洗淨處理好，起出兩邊較厚嘅肉後，切薄片，以鹽、胡椒粉、粟粉及蛋白稍醃。起鑊下薑片，將魚頭魚身（帶少許肉）煎至7、8成熟後以魚袋盛載，用同一隻鑊下水煲滾，放入魚袋及蘿蔔條煲上起碼20分鐘，之後再下一些個人喜愛嘅菜段，小妹我最愛中芹那陣味（事先炒下會香啲添），下了中芹段後，下點豆腐，滾起試味，之後會加點粉皮或米線，有時還會落隔夜飯（總之要飽肚嘅），灑點胡椒粉及鹽調味，之後下魚肉灼至差不多熟，熄火，便是一鍋鮮甜又豐富嘅晚餐喇！