我係「敢」煮：滑潺潺嘅菜點煮好？

我唔係大廚，亦無上過堂學過廚，只係由細幫手入廚煮飯，可以說係由細煮到大，兼因為做嘢接觸好多大廚，偷到唔少師，唔敢話煮餸好叻，但堅鍾意煮，又乜都敢煮敢試嘅現代港女。

－－－－－－－－－－

大家有無聽過木耳菜、藤菜、落葵或豆腐菜？其實統統都係潺菜嘅別名。叫得做潺，顧名思義真係滑潺潺，後生年輕一輩嘅未必鍾意嗰種質感，之不過這種每逢5至9月當造嘅深綠色蔬菜卻含豐富鈣質及鐵質，如果上廁所唔舒暢，潺菜更加係好幫手，因為佢有個別名，就係「腸道清道夫」。

點煮潺菜好？有個最簡單嘅方法，就係用蒜頭炒，不少人還會用蒜頭金銀蛋滾煮，唔少大廚都話潺菜同蒜頭嘅味好夾，仲可以吊出菜嘅鮮味添！之不過，小妹我鍾意飲魚湯，於是乎會趁夏日炎炎上廁所唔多舒暢嘅日子煮個潺菜豆腐肉片魚湯，（點解咁多材料？當晚餐食，差不多吧！）

做法好簡單，最重要是洗淨潺菜同埋煮好個魚湯（上一期已介紹過點煮奶白色魚湯：https://bit.ly/2Kkp7h2，今期唔多講），由於小妹我會當作一個晚餐來吃，故會下肉又加點豆腐，有時甚至連煲魚湯起出來嘅魚片都一齊煮來吃，加上怕滾完湯嘅瘦肉太韌太有嚼勁，所以會揀脢頭肉來煮，當然，如果「煮」人們覺得太肥，可以用番瘦肉兼唔使醃；而豆腐也可以不用煎，與肉片同放即可；如果大家又覺得配料太多嘅話，仲Easy，可以唔落豆腐或瘦肉喇！

材料：

豆腐 一磚

潺菜 半斤

薑 2片

蒜頭 適量

瘦肉/脢頭肉 適量

魚湯 6碗

調味料：

鹽 1/2茶匙

糖 1茶匙

生粉 1茶匙

生抽 1茶匙

做法：

1. 肉切片後用調味料拌勻稍醃；潺菜洗淨、豆腐切件、薑片略拍，備用。

2. 燒熱鑊，下少許油，豆腐煎至金黃色盛起；放入蒜頭及肉片炒香盛起。

3. 煲燒熱，下薑片爆香，倒入魚湯煲滾，放入潺菜、肉片及豆腐後，滾約10分鐘，下鹽調味即成。