我係「敢」煮：青口要脫毛？

我唔係大廚，亦無上過堂學過廚，只係由細幫手入廚煮飯，可以話係由細煮到大，兼因為做嘢接觸好多大廚，偷到唔少師，唔敢話煮餸好叻，但堅鍾意煮，又乜都敢煮敢試嘅現代港女。

－－－－－－－－－－

比利時雖然唔能夠奪得四年一度足球賽事嘅冠軍，但入到決賽贏埋英格蘭攞個季軍都唔錯喇！點解提起比利時？因為聽日7月21號正正就係佢哋國慶，而提起比國，當然唔少得食，要數比利時美食，又點少得啤酒與青口，問十個比國人推薦食乜，9個半都會叫你試「青口薯條」，最神奇嘅事就發生喺明明無青口出產，點解當地人咁鬼鍾意食嘅呢？仲要年耗達數萬噸，真係唔講得笑！

曾經，青口被比利時人稱為「窮人的肉」，事至今日，已化身成「黑金」，一啲都唔平，但依然係當地人家常美食。比利時人煮青口，可以話非常簡單，就係用牛油加白酒煮，放啲乾葱同番荽調味，有時仲會加點忌廉成Moules à la crème，有人會用麵包蘸埋啲肉汁嚟食，講到正宗食法，就會同薯條一齊食，即Moules Frites。

青口由於生長係水入面，唔似得蜆曉捐沙窿，要浸水吐沙，大家煮之前，只需將每隻青口用牙刷擦洗乾淨即可。對小妹嚟講，煮青口離不開蒜蓉炒或牛油白酒煮兩種煮法，要視乎青口嘅新鮮度。新鮮或真空包裝嘅青口或藍青口，小妹會用中式嘅乾葱蒜蓉炒，開口即撈起，肥嘟嘟脹卜卜夠晒爆汁，鮮甜得很；至於急凍或冰鮮嘅青口或藍青口，始終經過冷藏，水分又會流失啲，總覺得唔夠鮮味，小妹就會用西式煮法炮製成Moules Marinière，即用牛油起鑊，爆香乾葱及洋葱，下青口略炒，再落白酒（乾身白酒或Cider，煮起嚟會帶酸甜味，剛好平衡青口的鮮甜味），下鹽及黑椒調味，汁滾起，青口開口便可按喜好下忌廉拌勻，伴法包或薯條皆可，小妹就愛以冰凍麥啤搭配，超爽！

食用時，記得、記得、記得（好重要，所以要講3次）將每隻嗰執「毛」，唔係，其實唔係毛，係青口嘅足絲，係由青口自己分泌出嚟用以抓住堅硬物，嗰執絲超硬又韌似綱線，千祈咪食，有說最好喺烹調前拔走（如果夠力嘅話，拔時記得向下，向上會將青口肉劏開，烹調時就會流失水分及肉汁），小妹就唔嘥時間同氣力同執毛「玩遊戲」，只會在煮好後叫家人食時自己拔掉，一拉就甩，方便容易。

另外，大家或者曾有過小妹一樣嘅疑問，就係橙色嘅青口肉係咪肥美啲呢？實情係，非也！有大廚指出，顏色有異係由於公乸之別，橙色係乸、白色係公，味道與肉質基本上沒有分別，不過，小妹食咗青口咁耐，主觀認為橙色肉係厚一啲，肥嫩一啲，所以都偏好挑橙色肉嘅青口來吃喇！