【決性11點】女仔Friend啲內衣亂咁掛

男人成日叫啲女友或老婆唔好亂諗嘢，其實男人咪又經常亂諗嘢，有時仲話諗埋晒啲衰嘢添！不過呢單嘢究竟係咪當中男網友諗多咗呢？呢位男網民表示有位好玩得埋嘅女性朋友，尤其係兩人都鍾意打機。不過因為之前呢位女性朋友同屋企人住關係，所以對方經常上佢屋企，而為咗方便起見，呢位男網民仲畀咗條鎖匙對方。最近對方搬咗出嚟住，於是叫佢上去打機，點知佢一入屋就覺得奇怪。佢話：「我入到佢間屋，就見到啲底褲同胸圍掛晒出嚟，我咪扮睇唔到囉。不過傾偈時，對眼又不期然咁望咗佢啲內衣幾眼，咪畀佢捉到正囉。佢問我佢啲底褲係咪好多花款，我話係，因為有公仔底又有T-back底，佢跟住笑住同我介紹邊條佢最鍾意，邊條佢成日着。我問佢點解唔掛番入房，佢就話啱啱洗完要吹乾，跟住我就若無其事同佢打機。事後諗番，佢其實係咪色誘緊我，定係我諗多咗呢？」

網友神回應：

Love Love：呢種嘢真係好難講，因為我對住班男仔Friend都係咁。我哋太熟喇，識咗成十幾年，佢哋上嚟嘅時候我都唔會收埋啲掛緊嘅內衣，只係冇你個朋友咁會逐條介紹囉。

那年那日去旅行：你想多了啦！她是當你好姊妹才這樣做吧。說回來，你有沒有當她上來時，將你自己的底褲收入衣櫃呢？可能她覺得你既然都這樣做，她也不用太在意。

三日唔埋：擺明係有嘢啦！你話冇嘢我一定唔信，只係唔係佢對你有嘢，而係你肯定對佢有嘢，否則點會畀埋條鎖匙人哋，隨時上你屋企，咁仲唔係暗示對方係你女友？

高富稅：傻豬嚟嘅，底褲同胸圍之嘛，有幾咁奇怪呢？我啲女性朋友都係咁樣，又唔見佢哋擒咗我？你咪咁心多啦，隨時冇咗個老友㗎。