IB攻略：IB國際文憑的由來

香港考試課程，百花齊放，有舊時中學HKCEE會考，高考A LEVEL制度，2012年後又改制到HKDSE。而英國考試又有Edexcel，Cambridge，OCR，AQA等等嘅Exam Board。美國就有SAT同ACT，搞到家長頭都大埋。近年又興起IB，唔單止香港認可，外國大學都接受IB考試分數，不過呢，如果家長認識啲國際學校嘅小朋友或者家長，你又會發現，有啲學生讀Btec，IBMYP，有啲又讀IGCSE。唔熟國際學校嘅家長，真係一頭霧水，唔好話揀學校，揀完重要諗讀乜！今次筆者會同大家分享返IB嘅由來同考試制度。

IB係1968年，瑞士人發明嘅讀書制度。全球化底下，好多在職父母都要飛嚟飛去，本身可能喺德國做嘢，公司擴充去亞洲，可能又被分配到其他地方，啲仔女都要跟埋過去。但係，每個地方都有自己嘅語言，同埋學制，例如中國行普通高考，但係香港行DSE，根本就無一個學制係全球統一化。你不嬲學開英文嘅科目，掉咗去香港被迫要讀DSE中文，俗稱死亡之卷，天才極都會肥佬，皆因你都唔熟個學制。由於係咁，所以就有統一學制，適合飛嚟飛去嘅學生讀。因為你去到邊，讀嘅科目都係一樣，考試唔會因為地區轉變而改變。不過呢個學制喺香港，就變咗質。通常家長揀IB學校，唔係因為公幹嘅需要，而係為咗避開本地考試嘅競爭，揀一條容易啲嘅路上大學。

咁IB係讀啲乜呢？佢有分IBPYP，IBMYP，IBDP同IBCP。PYP嘅P係Primary，即係小學課程，MYP嘅M就係Middle Year咁解，即係中學課程，最後就係Diploma嘅IBDP，即係預科，準備讀大學嘅預備班，為期兩年，Year12同Year13，即係我哋嘅中五、中六。咁IBCP係乜？讀晒以上嗰啲都升大學啦，仲有考試？其實IB制度都好周詳嘅，香港上唔到大學嘅，會去IVE職業訓練，而IBCP嘅Career Program，就係畀啲考得唔好嘅學生讀。IBDP要讀6科，但係CP就兩科搞掂，最多讀4科。不過，IBCP讀大學基本無保證，因為全球都係收IBDP嘅學生，CP讀完要讀Foundation上其他大學或者要出嚟做嘢。如果家長係Year 13收到學校通知，叫你轉IBCP，因為之前考得唔好，記得幾大都唔好轉，寧願搵補習惡補，都唔好轉制，如果唔係，呢幾年嘅IB學費嘥晒，考完重要冇大學收，讀嚟其實都無謂。

Edward

HKExcel IB Specialist共同創辦人，教育超過三千名IB學生

拔萃男書院畢業生，英國高考取得5A成績

曾獲邀到多間IB學校分享應試心得

曾撰寫「IB攻略」在書展大賣