SMART風：IG吸Like必學！　4招美化Post

Instagram（IG）內置大量相片、影片特效，加上得意貼圖，早已成為Social Media界的新「戰場」。想出Post多啲人畀心心，又或者得到更多粉絲追蹤，無論一般Post、限時動態（Story）甚至個人頁面都要更特色、更吸引先得，今次就教你4招美化Post，Like數即時直線上升！

第1招：彩虹字體

玩Story好多人都會輸入文字內容，雖然IG已經預設4款特別字型選擇，但字體顏色原來仲有新玩法。用家框起文字時，畫面下方就會顯示指定顏色選項，再長按顏色選項就可以自選顏色。其實大家除了將所有文字轉為同一顏色，亦可以轉成彩虹色。方法是框起文字時，輕框文字框會將文字局部放大並顯示一個三角形符號，用家只要一邊邊三角形符號拉至不同文字，並同時長按顏色選項轉換顏色，文字就可以變成彩虹色。

第2招：文字加陰影

除了彩虹色文字，有冇發現有用家Story上的文字竟然有陰影效果？原來方法其實好簡單，Story頁面輸入文字後，再按右上角文字選項再重新輸入同一組文字，並轉上黑色或白色，之後將兩組文字疊起即可，所以用家願意花心思的話，文字有多重、不同顏色的陰影都冇問題！唯一操作難度是要將幾組文字的大小調整至一模一樣，需要花少少時間。

第3招：個人檔相片牆

IG的個人檔案頁面以三幅相片一欄顯示，想個人檔案更有特色，可以將一張相片分割開三格、六格或九格顯示，形成一個相片牆的震撼效果。要製作以上效果，用家需要預先下載《Tile Pic》等裁相App，設定好需要裁剪的形式，例如3x3、1x3等，App就會自動完美裁剪並儲存在手機相簿中。之後用家順序上載裁剪後的相片即可，留意切勿貪方便使用IG批次上載相片的功能，否則個人檔案頁面無法顯示出相片牆效果。

第4招：自製局部動態相片

要於眾多Post中突圍而出，單單上載相片、影片當然唔夠！咁就要試下近年最流行、俗稱局部動態相片的Cinemagraph。以往要製作Cinemagraph，例必要出動電腦軟件Photoshop，效果特別但太浪費時間，依家靠App都得。可以製作出Cinemagraph的App主要分兩類，例如《Plotaverse》就利用相片，用家再選擇相片需要局部移動的位置，效果冇咁完美但就較易操作；另一類例如《Cinemagraph Pro》就利用短片，將短片局部定格及局部重播，效果較好，但拍攝短片前就需要預先就位，各有優劣。