點解咁香？日本TSUTAYA賣Pizza？

半夜三更肚餓！搵邊個？梗係搵為食妹妹啦，但呢個時候為食妹妹都瞓咗啦，咁邊個可以打救我個肚呢？假如有塊熱辣辣嘅Pizza食就好啦！無啦啦點會有Pizza食，便利店都未必有得賣啦，但如果你喺日本廣島，咁就唔驚啦！

話說上個月尾複合式零售店TSUTAYA廣島楠木店，喺門口加設咗一部「地道意大利風味」Pizza自動販賣機，據知呢部機係第一部登陸日本架！

呢部機提供Margherita及4種混合芝士兩種口味，價格分別為980 日圓（約HK$70）和1,280日圓（約HK$90）。至於操作方面，同其他自動販賣機一樣，只要透過螢幕落單後，入錢，等大約3分鐘，熱辣辣嘅Pizza就會出爐，並附有外賣專用袋同刀，非常體貼。依家呢部機暫時作測試性質，遲啲可能推展到其他TSUTAYA 分店，下次去日本不妨試下買番個，睇下係咪正宗意大利風味！