我係「敢」煮：水母都食得？

我唔係大廚，亦無上過堂學過廚，只係由細幫手入廚煮飯，可以話係由細煮到大，兼因為做嘢接觸好多大廚，偷到唔少師，唔敢話煮餸好叻，但堅鍾意煮，又乜都敢煮敢試嘅現代港女。

－－－－－－－－－－－－－

水母都食得？係，做冷盤仲一流添！當然，並非每一種水母都食得喇，講嘅係平時大家去茶樓食飯，尤其是柯打一碟燒味拼盤時常見嘅海蜇。

海蜇，屬一種珍寶水母，而水母，又係一個非常大嘅家族，其中有70個品種具毒性，而大家食用嘅海蜇，屬缽水母綱（Scyphozoa）類別，無毒、體型較大、膠質特多，亦可食用。

海蜇亦有好多名稱，有人叫瑝魚、海蛇、紅蜇、面蜇或鮓魚等，多分布在熱帶、亞熱帶及溫帶沿海水域。其實，新鮮嘅海蜇具毒性，需用食鹽、明礬（硫酸鋁鉀）等浸醃以清洗及去毒，最後以鹽醃住再供應市場，而大家一般都可以在雜貨店選購得到。

海蜇有分皮及頭兩部分，「皮」指嘅當然唔係水母層皮，而係水母傘蓋部分，韌性十足；至於「頭」，則係觸鬚部分，口感相對較為爽脆。

點樣揀靚海蜇？基本上呈白色、黃褐色或紅琥珀色，兼且肉厚、無黑斑及泥沙者已算是上等貨色。在雜貨店選購得到的海蜇，多是以鹽醃住（以防變壞），拿回家後需用水洗淨，去除鹽粒、沙塵等再用水浸發，一般2至3日便能脫礬，減淡鹹味，記得每日換水。

浸發好嘅海蜇，可以滾水稍灼，但千祈唔好灼太耐，否則海蜇收縮兼變韌，嘥工夫！至於調味，仲簡單，只需下少許鹽、醋及麻油撈勻，已經非常爽脆又好味。唔怕食凍嘢嘅，仲可以放入雪櫃稍加冷藏，即成消暑涼菜。海蜇口感好、味道好之餘，營養亦豐富，蘊含豐富氨基酸及膠質，低脂低膽固醇又低熱量，最重要是含日常飲食入面少有的碘呢！