Android轉iPhone必學4招

新iPhone剛剛正式發布，除了唔少iPhone用家都會急不及待升級出機，亦都會有Android用家想轉會去iPhone，之不過最麻煩係唔知點樣將Android手機的資料轉移到iOS，留意以下幾招，自己落手搞都可以輕鬆轉會。

第1招：Apple自家《Move to iOS》 完整轉移

好多時自己唔識搞，好怕剷晒所有資料，都會落手機舖搵人搬資料，其實Apple為了方便Android用家轉會，就推出自家的《Move to iOS》App，並安裝到Android手機上，能夠畀你將聯絡人、相片、影片、短訊、電郵、日程表、部分App等複製到iPhone，唯獨Whatsapp內容就轉移唔到，但總算做到一次過轉移。

利用《Move to iOS》轉移，要特別注意幾點：（1）需要將iPhone重置為原廠設定，全新機一般就冇問題。（2）透過Wi-Fi網絡傳送，而兩部手機需連着相同的Wi-Fi網絡。（3）若要移轉Chrome內書籤，必需把將Android手機內的Chrome更新至最新版本。（4）傳送期間不能用其他App或接聽電話，屏幕要保持開啟狀態，一旦處於休眠狀態，都會停止傳送，甚至有機會要重新執行。

第2招：《Copy My Data》簡易傳送

若嫌《Move to iOS》過程太複雜的話，可以使用《Copy My Data》App，轉移步驟簡單又免費，唔單止做到Android轉iOS，亦都做到iOS轉Android，所坊間唔少手機店舖都靠佢轉移，搵人搞不如自己搞。大家首先將Android手機和新iPhone，都下載《Copy My Data》，之後能夠傳送聯絡人、相片、影片和日程表，雖然轉移資料冇《Move to iOS》咁全面，但最基本唔使你重置iPhone至原廠設定。

第3招：同步資料到Google帳號

若然大家的手機資料不多，又或唔需要轉移太多內容的話，Android手機用家可以將郵郵件、通訊錄、日曆、備忘錄等，同步至Google帳號進行備份，然後在iPhone中登入Google帳號，並下載資料，就能夠做到簡單轉移，過程簡單又快捷，但缺點係轉移的資料有限。至於Android手機內的相片和影片，就需要上載到Google Drive雲端，並在iPhone下載。雖然轉移過程要分開做，但至少唔會有遺失資料的風險。

第4招：《Backuptrans》搬WhatsApp內容

前面3招都無法轉移Whatsapp內容，而且就算用對話備份，都做唔到誇平台轉移，所以一般方法基本上唔可行。因此若然想將Android手機內的WhatsApp內容，完整轉移到新iPhone，可以使用第三方付費軟件《Backuptrans》，於網址：www.backuptrans.com點選當中「Android WhatsApp to iPhone Transfer」，即可兼容Windows同Mac平台，並能夠將Whatsapp內的文字、相片、影片、群組、對話內容完全轉移到電腦內，並同步到iPhone就大功告成。《Backuptrans》的售價為19.95美元（3裝置版本），大約是港幣$160左右，雖然售價上絕不便宜，但睇你覺得Whatsapp內容值唔值呢個價。