IB學生報讀美國大學　一定要考SAT/ACT

香港IB學生除咗鍾情報讀英國大學之外，美國大學亦係其中一個最受歡迎嘅選擇。但係美國報大學一啲都唔簡單，程序非常繁複。今期筆者會分享一下報美國大學需要留意嘅事項。

【申請美國要額外考試】

如果學生淨係考IB，係絕對唔足夠申請美國大部分嘅大學！因為學生需要考SAT或者ACT， 先可以報讀美國大學。同學可以點樣報讀呢個考試？香港考試及評核局（ETS）係其中一個受美國教育考試服務中心委託為香港其中一個舉辦SAT同ACT嘅考試中心，同學可以經ETS自行報名。SAT每年在10月、12月、3月及5月於美國以外的世界各地舉行，而ACT考試每年在9月、10月、12月、2月、4月及6月共6個月份舉行，所以策略上嚟講，如果學生需要重考，ACT因為舉辦考試次數多過SAT，會容易啲安排到時間。不過，SAT對香港人嚟講就比較出名啲，始終歷史較悠久，SAT首次舉行係1926年，ACT就1959年。但係兩者認受性有無分別呢？基本上兩者喺美國係一樣嘅。

【SAT/ACT應該考幾多分？】

就以史丹福大學為例，常春藤名校中的名校，SAT分數平均都1,520（ 1,600分滿分）， 最低嘅25th percentile，即係最低嗰啲都講緊1,450分，可能讀者分唔到有幾高分，以100分換算，1,520即係95分，1,450即係91分左右！咁可想而知，競爭有幾激烈。Stanford ACT平均分係33（滿分係36），最低嗰1/4人都係31分！再換算番，即係大約92分同86分，所以ACT分數要求相對低啲，不過同學要知道兩個係完全唔同嘅考試，難度基本反應咗係分數到。即係話，ACT考試某程度上應該係難過SAT。

如果同學唔係報IVY LEAGUES嘅名校，最受歡迎嘅一定係UC System 10間入面嘅UCLA同埋UC Berkeley。 Times Higher Education（THE）世界排名分別係15名同18名。不過喺QS World Ranking嘅排名，UCLA就係32名，UC Berkeley就27名。其實兩個都差唔多出名，心理上舒服啲嘅，就梗係睇Times嘅排名，始終係世界頭20名。再睇睇兩間大學，SAT同ACT嘅分數，UCB SAT平均分係1,440，ACT就32，而UCLA SAT嘅平均分數係1,370或者ACT 29分。所以UCLA係容易入過UCB嘅！

學生會問，如果學校淨係睇SAT/ACT， 讀IB仲有咩用？同學要想像呢個係一個兩部曲嘅遊戲，首先要美國考試達標，跟住學校就會睇你嘅IB分數，從而畀條件取錄。但係，同學就算IB考45/45，如果冇考SAT/ACT都係徒勞無功。

【留意SAT Subject考試】

上面講嘅SAT考試，都係SAT I，即係General嘅考試，所有人報美國都一定要考。但係某啲特別科目，學生需要考額外嘅SAT考試，無錯！連SAT都有多一個考試！例如，同學報讀Cornell康奈爾嘅工程系，你需要SAT Subject Test嘅數學，同埋一個科學嘅考試，即係連埋SAT 1，總共3個考試，的而且確係辛苦嘅，所以同學要報讀美國大學，要預備下更加多功夫。

Edward

HKExcel IB Specialist共同創辦人，教育超過三千名IB學生

拔萃男書院畢業生，英國高考取得5A成績

曾獲邀到多間IB學校分享應試心得

曾撰寫「IB攻略」在書展大賣