國際學校學生畀大家嘅感覺就係鬼仔鬼妹，就算外表係華人都好，都會好似喺《Crazy Rich Asians》入面形容嘅「Bananna」──黃皮白心。既然英文已經「叻叻聲」，究竟IB學生去到英國要唔要考英文語文測試IELTS（International English Language Testing System）呢？好多家長即刻?晒頭，上次講完某些專科要考額外嘅考試，如UKCAT，BMAT，LNAT等等，依家仲有多一個考試！係，無論同學英文係Language A或B都有機會要考IELTS，筆者一陣為你解答！

首先講講何謂IELTS，呢個考試主要為英文非第一語言嘅學生，證明佢哋嘅語文能力達標。IELTS考試於1989年成立，由英國British Council，澳洲IDP同埋劍橋Cambridge Assessment English合力創辦。所以，香港學生去英國或者澳洲，好多時候都要求IELTS。如果學生諗住移民英國，IELTS係唯一嘅認可考試，所以唔好走去考TOEFL，如果你係諗住去英國。

IELTS考試嘅模式同HKDSE類似，不過同IB英文文學分析完全不同。考試分4個部分，聆聽、閱讀、寫作和說話，以下係考試時間嘅分布。

Listening：10+30分鐘

Reading：60分鐘

Writing：60分鐘

Speaking：11-14分鐘

聆聽考試，學生要一路聽住個錄音帶，可能係填充題、畫圖，或者選擇題，一路聽一路作答。10+30嘅意思係測驗時間30分鐘，但係學生有10分鐘整理答案，因為好多時候學生聽得切，但係寫唔切，可以想像錄音講者唔會當你初學者，慢慢咁講。

閱讀方面，學生需要喺短短一小時內，完全明白3篇，總字數大約2,500字嘅文章。題目可以係短答題、選擇題、填充題目，同埋標籤題目（Labelling）。文章嚟自雜誌、報章，或者書籍節錄。題材可以五花八門，可以有關針對某些政策評論美國經濟興衰，或者物理學者對黑洞嘅研究報告分享，主要考學生對作者觀點嘅理解。

寫作方面，學生有兩個任務，一個至少150字嘅短文；一個250字嘅長文。喺短文入面，主要考學生描述能力，會有折線圖表、表格、圓形統計圖等等。長文方面，主要考學生爭辯嘅能力，題目就係「中學生應否談戀愛」這類題目。所以學生要建立論點，分析各種不同觀點，最後作出結論。

最後就係說話，考試分3個部分。第一部分係介紹，考官會同你傾閒偈，大概知道你對答嘅能力，第二部分係最難嘅，因為考演說，考官會畀一條題目叫你自己發揮，好多學生都係呢度會口窒窒。最後部分就係討論，考官會針對你頭先嘅演說，問番啲深入嘅問題，考你點樣對答。

好啦，講咗咁多，大家都應該對IELTS考試更加熟悉。不過重點，IB讀第一語言嘅學生，幾時要考IELTS呢？如果你嘅分數係低過Level 5， 即係1-4分，你就一定要考，因為只有5級或以上，同學先可以免除IELTS之苦。讀Language B （第二語言） 嘅學生就一定要考，冇得避！

IELTS滿分9分，同學如果目標係最高學府，就最好考7分或以上，而且係每個部分一定要有7分或以上，即係如果你考總分8分，但係Reading係6.5 ， 最好就重考啦！

Edward

HKExcel IB Specialist共同創辦人，教育超過三千名IB學生

拔萃男書院畢業生，英國高考取得5A成績

曾獲邀到多間IB學校分享應試心得

曾撰寫「IB攻略」在書展大賣