【慳家Pay聞】長期糧尾福音 食飯平10蚊

20181013
東網電視
更多新聞短片
支付寶要同WeChat Pay抗衡,今次又有優惠吸客喇。(黃宏卓攝)
呢幾日若數可以同洗版嘅施政報告抗衡嘅News,怕且都係電子支付嘅新promo咯。話說支付寶HK啱啱聯同大快活豪送$95現金券!咪跳起Yeah住,因為要新用戶(11月11日前下載)先有機會攞到盡,只要你從未領過迎新優惠,就可選擇50蚊現金券(共5張/每張10蚊),雖然每次付款($30以上)限用一張,唔可以一次過用嚟鋸個扒,但都夠搣成個星期早午晚餐嘅。至於舊用家們,一樣有10蚊現金券,買夠30蚊就用得,而且可以儲印花(買滿$25以上可得一個),儲夠3個又賺15蚊,留番糧尾使用都幾盞。推廣期內仲有其他優惠,記得大家自己發掘啦。
轉賬易咗兼袋廿蚊 堅有咁筍?
另外推出不久嘅「轉數快」服務,喺各大銀行現金回贈攻勢下,若然你仲Hold得住,又咁橋你用嘅係渣打銀行,就要留意了,事緣渣打剛剛出手,用戶在指定日期內登記服務兼設定為預設戶口,轉賬一次畀第三者,就有廿蚊現金回贈,比起有啲銀行要轉幾次甚至有指定金額,呢廿蚊相對易入手,留意優惠只限首10萬合資格用戶咋;此外,每日使用「轉數快」服務仲可以參加抽獎,有機會贏取里數,有興趣就自己去番銀行網頁研究研究喇。
(以上資料只供參考,詳情以各銀行/機構為準)