【蟹季懶人包】: 一文睇晒幾款青蟹

青蟹，大家或許會想到俗稱嘅「十蚊紙」，之不過，蟹季講嘅當然係食得嘅青蟹喇！如果問，大家有無食過青蟹？應該唔少人會答：食肉蟹同膏蟹多啲！其實肉蟹同膏蟹都係青蟹，分別只在於公乸，肉蟹是公、膏蟹是乸，而「BB」蟹乸則是奄仔蟹，外形自然相對的骰但充滿油膏，是夏日老饕追捧蟹款之一。至於另一大受歡迎嘅夏日當造黃油蟹，都係膏蟹嚟，只係天氣熱，油膏因高溫而溶化流滿全身，成為香港獨有嘅時令美食，而青蟹屬梭子蟹科，所以如果有人問你，有無食過梭子蟹，就要想清楚至好答喇！

青蟹係半鹹淡水蟹，肉蟹肉質零舍鮮美，而膏蟹嘅膏亦特別稠密。想知膏蟹多唔多膏其實唔難，首先係攞上手要夠大隻兼墜手，之後就要睇下個殼色，通常青中帶黃，個奄位飽滿甚至凸起，即代表非常多膏嘞！講多樣行內揀膏蟹秘技，就係「頂角」，如果將蟹放在光下照，如角落位有陰影出現，甚至黑作一團，即係「頂角」上佳貨色，代表爆晒膏；而發現黑影中間出現空隙，即膏唔算特別多，只能是「花膏」蟹，點都好過無膏嘅！

如果食肉蟹，主要食啖啖肉及其鮮甜味道，自然要講求蟹嘅新鮮度（噚日講過點揀生猛靚蟹，今日不再重複）。此外，可以輕按按蟹腳，如果夠厚實，代表多肉。

【薑葱炒肉蟹】

材料：

肉蟹　兩隻

葱　適量

薑片　6片

蒜頭　2瓣

乾葱頭　2粒

醬汁：

蠔油　3湯匙

水　3湯匙

生粉　2茶匙

做法：

1. 葱洗淨，分開青葱及葱白切段；薑片略拍；蒜頭、乾葱頭去衣切碎。

2. 以牙刷擦洗蟹後去奄起蓋，去腮去胃後以清水浸洗再斬件。

3. 瀝乾水後下少許生粉拌勻。

4. 燒熱鑊，落油燒滾後下蟹件，以中大火半煎炸方式煎至乾身，盛起備用。

5. 再起鑊，燒熱油後下薑片爆香，放入乾葱略爆，下蒜粒和葱白略炒，放入蟹件，下一半青葱，下醬汁快炒，熄火後放入青葱兜勻即可上碟。