5.7K全景玩定拍　Insta360 ONE X

雖然360球形全景拍片都Hit了一段時間，不過就唔係部部都好似Action Cam咁，可以畀你帶住上山又下海，而全新Insta360 ONE X全景攝錄機，唔單止大大升級至5.7K超高畫質，亦能夠畀你外加不同配件，無論潛水、踩單車、航拍，玩齊晒海陸空都應付自如。

植入FlowState核心防震技術

現時市場上的360全景攝錄機，大都支援4K全景拍片，不過全新ONE X全景攝錄機所配備的兩支魚眼鏡頭，各自支援200度視角，而畫質已提升至5.7K@30fps、4K@50fps、3K@100fps全景拍片，而且提供1,800萬像素的全景相片，就算放大畫面都依然清晰銳利，加上新增了FlowState核心防震技術，能夠自動修正偏移、傾斜和旋轉畫面，即使沒有加裝手持穩定器，都拍到穩定唔Chok的畫面，適合大家安裝在頭盔或航拍機上。

LED屏幕顯示資訊

ONE X一改上代的子彈外形，轉用了長條形設計，機身小巧僅有90g左右，備有LED屏幕，顯示拍攝質素、電量、拍攝模式等資訊，並採用1,200mAh的可拆式電池，可持續拍攝長達60分鐘，有別於上代的內置設計，換言之換電後又可以繼續拍攝。ONE X固然支援Wi-Fi功能，可配對《Insta360 ONE X》手機App，控制鏡頭拍攝、即時預覽影片、下載影像，甚至可串流到facebook直播呢。

新增Drift Shot效果

若然大家有印象的話，上代Insta360 ONE可以憑着一條繩子，高舉在頭上不停揈，大玩Bullet Time影片效果，今次新機ONE X唔單止玩到Bullet Time，更可配合仿似飛鏢的拋擲配件，攝錄時同時掟出機身，即可大玩全新Drift Shot（空中飄移）效果，用家可手動調校畫面角度和影片分段播放速度，另外亦備有TimeLapse、HyperLapse功能，製作獨一無二的電影效果，不過拋擲配件預計下個月先至賣街。此外，用家亦可額外購買支援5米防水的簡易防水保護殼，或者深潛達30米的潛水殼，照顧到熱愛玩水的人士需要。