【決性11點】光之美少女內衣　下月推出

日本少女動畫同內衣有乜嘢關係就唔知，只知道如果將兩者加埋一齊嘅話，可以營造出既性感又可愛嘅感覺。如果唔明嘅話，睇吓呢兩款女性內衣，就能夠體會到呢種感覺有幾吸引。話說為咗紀念日本人氣少女動畫《光之美少女》推出15周年，最近日本ABC動畫及東映動畫推出以《光之美少女》為主題嘅女性內衣，設計以初代版為藍本，共有兩個款式，分別係黑天使（Cure Black） 同雪天使（Cure White），兩款設計有啲分別，黑天使採用黑同粉紅兩色，雙肩係粉紅色吊帶，而雪天使則採用白及粉藍兩色，雙肩則係白色花邊吊帶。然而最惹人遐想嘅係有花邊嘅底褲，不過有男網民就疑惑究竟喺乜嘢情況下，女士可以着到呢條咁多花邊嘅內褲呢？因為理論上佢唔係咁適合着喺套裝及日常衣服裏面。其實計我話，呢套內衣根本唔係喺日常穿着，而係着畀男友睇嘅勝負內衣嚟！不過姑勿論如何，呢套既性感又可愛嘅內衣將會喺11月推出，大家有興趣可以留意一下。