50米防水Fitbit Charge 3　用足一星期

Charge一向是Fitbit智能手帶最受歡迎的系列之一，8月尾品牌正式發布的Fitbit新智能手帶Charge 3，而繼美國之後，香港就成為第二個推出的地區！新作設計與上代Charge 2相似，但就換上尺寸更大觸控OLED屏幕，屏幕亮度比上代提高20%，亮度更會因應環境自動調整，戶外都睇得清楚。錶殼採用航空級鋁材製作，而上代機側的實體鍵則改為壓感按鍵，一按即返回上一頁，反應靈敏。

基本功能方面，Charge 3支援50米防水、天氣、日曆、來電短訊提示，最重要當然是續航力提升至7天，用足一星期。而Fitbit一向主打的健康功能當然唔少得，除了自動識別用家正進行的運動，亦內置24/7 PurePulse心跳監測技術，並且內置15個運動目標模式，包括跑步、單車、游泳等，用家可以設定卡路里消耗、時間等不同目標。值得一提是，Charge 3亦加入SpO2感應器，可以量度用家的血氧飽和度，不過相關功能暫時未開放，要再等等喇！

配色方面，一般版分黑錶膠帶/石墨外殼、藍灰膠錶帶/玫瑰金外殼、白色運動錶帶/石墨外殼，另有特別版改用薰衣草織布錶帶。而錶帶均用上快拆設計，更換方便。