【19月曆】美人魚月曆　藝術加實力表現！

月曆嘅嘢，你識條魚咩？啱呀，當閣下上網搜尋「性感」、「全裸」月曆呢類關鍵詞時，總會見到好多、勁多、超多裸女攬住一條大魚圖，但你總唔明白更無興趣深入了解，明白嘅，因為係德文嘛！

等細佬話你知，查實佢係一本喺歐洲非常暢銷「運動月曆」，全名叫「Carponizer Karpfen kalender」，2019年經已出版喇！不單止你好奇，全球嘅人都問月曆係賣女定賣魚，錯錯錯，事實係賣高端釣魚用具，Carponizer呢間公司喺德國報稱有實舖兼有網店，社交網已有兩萬幾人Like過，而有傳喺2013年，公司負責人Hendrik Pöhle想宣傳公司無奈冇乜諗頭，於是就整咗本月曆喺展銷會時半賣半送。

「美人魚」月曆原意出於「自我感覺良好」，點知外界咁大迴響，結果一年復一年，至今成為每年最大Project囉！咪講笑，銷售釣魚用具純粹一買一賣，但拍呢本寫真月曆，每年至少要十四位金髮女郎參與，仲未計幕後工作人員出力，而翻睇佢社交網動向，早喺年初2月份佢哋就要為來年月曆準備，由拍攝到後期再印制，製作超過大半年㗎！堅持足咁多年，又有人問點解唔改變？呢啲咪叫風格囉，Carponizer正職係釣魚，而Karpfen德文解鯉魚，因此月曆從來只得美女同大魚，甚麼蝦蟹海產絕不會出現於寫真內，亦有口痕友擔心攬住條魚算唔算「虐待」動物？呢方面外國有雜誌喺2017年訪問過老闆，對方就親口承認，所有拍攝嘅魚都係保證「活着」，各位眼前見到條魚咁乾淨，係因為製作團隊事前有幫條魚洗白白咁解啫！

嚟到最後一條問題，點解Carponizer會有「美人魚」月曆構思呢？負責人話：因為男人最大興趣係釣魚同美女，而佢本人清楚記得，當年同朋友海邊釣魚期間，旁邊有兩位辣妹曬緊太陽令佢有無限聯想，呢個幻想成就佢推出美人抱大魚信念。亦因為咁，美人魚月曆被歸類為運動月曆（Sports Calendar），同色情無關㗎，不管你信不信，反正我都係為睇女啫！