【決性11點】牙膏可豐胸？　真相係……

女人對美胸嘅追求有幾執着？單從坊間有唔少豐胸方法就知，例如每日原地跳100下、彎腰並按摩胸部、飲木瓜牛奶等，至於有冇效就不得而知。不過講到最騎呢嘅豐胸方法，莫過用牙膏嚟豐胸，據稱只需要每日用牙膏嚟按摩雙峰，5日就可以見效。

有位美國女網紅就決定照做，試吓堅定流，同時測試埋另一個坊間豐胸方法，就係用凡士林按摩雙峰。呢位叫做Mesha嘅女網紅唔係試5日咁少，而係足足試咗一個月，結果發現雙峰根本冇變大過！佢表示用咗凡士林後一啲感覺都冇，而用牙膏除咗令胸部會散發出薄荷香味，同埋有冰涼嘅感覺之外，就冇其他任何嘅反應同效果。其實牙膏可以豐胸呢個講法，對知道牙膏成分嘅人嚟講，一睇就知係個笑話，事關牙膏嘅成分不外乎氫氧化鋁、氟化物、碳酸鈣等，點會有豐胸嘅作用呢？至於凡士林係用嚟護膚同滋潤肌膚，又何來豐胸效果呀！