【地靈人美】岐阜之花伊藤寧寧　重裝上陣

家鄉為日本岐阜嘅前乃木坂46成員，可愛小花伊藤寧寧最近喺社交網發表一則消息，話自己將會喺11月29日擔任一份公職，就係獲委任成為岐阜縣警署嘅「一日機動隊長」，相信當日伊藤寧寧一定會喺警署機動部動嘅陪同之下威風凜凜咁上街巡邏一番，並且會向大家宣揚預防罪案嘅訊息。

其實伊藤寧寧剛剛出道嘅時候，就喺2008年加入日本足球隊伍FC岐阜嘅專屬啦啦隊「GREEN ANGELS」，之後再成為FC岐阜嘅應援經理，可以話一直都紮根家鄉，今次獲安排成為岐阜縣警署嘅「一日機動隊長」，相信又可以幫助寧寧喺家鄉增升人氣喇。

岐阜縣位於日本中部東海地方，與長野縣、愛知縣、三重縣、滋賀縣、福井縣、石川縣、富山縣比鄰，人口約200萬人。提到岐阜，相信唔少了解過日本戰國史嘅朋友，應該會聯想到知名嘅戰國人物織田信長，因為岐阜城原名為稻葉山城，被織田信長攻克之後就將之改名為岐阜，並且同時計劃開始展開其偉大嘅天下布武戰略。

岐阜擁有好多值得旅遊嘅名勝景點，岐阜城固然係其中之一，至於被稱為日本三大溫泉嘅下呂溫泉、被列為世界遺產嘅白川郷合掌造村落以及被稱為北阿爾卑斯嘅飛驒山脈，同樣吸引好多旅客慕名而。唔知伊藤寧寧做「一日機動隊長」之餘，會唔會順便浸吓溫泉呢！