IB攻略：IB學生美國升學4大要點

話說上星期四，筆者補習社同美國升學中心Kaplan Test Prep中心有個合辦嘅講座，題目係美國升學同埋IB嘅新趨勢同考試技巧，由於唔係全部東網讀者都有參加，順便喺呢度分享上次嘅內容。

【考SAT定ACT？】

SAT同埋ACT兩者只會揀一個嚟考，原因係時間有限，大學亦都只係睇一個成績，但係揀邊個嚟讀，原來都有學問。如果學生數底好嘅，揀SAT，因為計分比重比ACT多。但係學生如果Science好好，文字都唔錯，可以考慮ACT，因為只有ACT係有Science考嘅。

【SAT同ACT一年有幾次考試？】

IB學生都知道IB大考得一次咁多，衰咗就無。但係SAT，ACT你又知唔知可以考幾多次？SAT一年可以考足7次咁多，而ACT仲勁，可以考24次。同埋呢兩個考試原來都可以早啲考，唔一定要堆到去IB Diploma Year先考。唔似IELTS，考試成績只可以有兩年，ACT，SAT Year 9已經可以考。

【SAT爆分，IB好差，入唔入到常春藤？】

有學生問到，聽講美國大學成日都畀Unconditional Offer （無條件取錄），如果學生SAT爆分（1,600 為滿分），或者ACT 36分滿分，但係IB得37分（舉個例），入唔入到常春藤八大名校呢？答案係缺一不可。同學一定要兩邊都達到要求，而且美國升學睇重埋Supplementary Essay，係少數國家睇重Personality作為收生標準。因為好多其他地方都係睇重成績多。不過順帶一提，報讀美國大學係一個極度繁複嘅過程，我哋見過好多學生可能一次過報10間美國大學，淨係Essay嗰Part都做死，最後要放棄幾間申請先夠時間。

【SAT/ACT語文科目考試可以取代IB？】

最後係有個家長問，ACT/SAT咪有Subject Test嘅，即係科目考試，係人都知IB中文難，可唔可以唔考IB中文，用美國科目考試取代。答案原來又係唔得！因為美國如果知道你係中國人（個樣都似嘅話），你考SAT/ACT中文科係等於唔計，就好似俗語講：出Cheat咁！所以如果學生揀咗IB中文A，都係要努力㗎喇，無窿窿罅罅可以走。

Edward

HKExcel IB Specialist共同創辦人，教育超過三千名IB學生

拔萃男書院畢業生，英國高考取得5A成績

曾獲邀到多間IB學校分享應試心得

曾撰寫「IB攻略」在書展大賣