大家有冇數過自己有過幾多個性伴侶呢？最近英國嘅調查網站「On Average」就發表咗關於性伴侶人數調查，佢哋綜合咗大量嘅數據後，發現性伴侶平均數為9.8個，當中男性係略高於9，女性則係略低於9，數量上英國男女嘅性伴侶數量差唔多。不過大家唔好畀9呢個數字嚇親，因為據調查網站表示，全球性伴侶嘅平均數都係9位，換言之英國男女嘅性伴侶數量其實並唔多。

話時話，9位性伴侶只係全球嘅平均數，如果細分嘅話，全球性伴侶人數最多嘅係土耳其，佢哋嘅平均性伴侶人數為14.5位，而最少嘅則係印度，平均只有3位。調查又發現喺幾乎所有被調查嘅國家中，男士嘅性伴侶人數都比女性為多，唯獨新西蘭係相反，女士嘅性伴侶數量多於男士。

至於發生第一次嘅年齡，英國男女平均喺18.3歲時發生，當中女士發生第一次嘅年齡會比男士為輕。反觀亞洲國家，發生第一次嘅年齡平均喺20歲以上。