掌中拍片神仙棒 DJI Osmo Pocket
20181207
東網電視
更多新聞短片
Osmo Pocket只有手掌般大,重量更僅有116g,的骰細支方便攜帶。(盧展程攝)
無論使用相機、手機、Action Cam去拍片,好多人都會加支手持穩定器,不過傳統的穩定器都大大支,拎得耐又會手攰,有時真係未必想帶出街,而DJI就推出了激細的Osmo Pocket口袋雲台相機,Size只有手掌咁大,方便隨身攜帶,畀你隨時隨地拍靚片。
【三軸4K 高質穩定】
Osmo Pocket的尺寸僅有121.9x28.6、36.9mm,而重量亦只有116g,機身備有三軸雲台相機設計,並支援4K@60fps拍片,實試無論邊行邊自拍,甚至乎上落樓梯,都依然穩定流暢唔會窒。雖然Osmo Pocket機仔細細,卻配有一塊觸控式屏幕,顯示實拍畫面及重播影像,而且支援人臉偵測功能,只要篤兩下芒即可Lock實主體,而雲台亦會跟住移動,就算跟甩主體都能夠重新鎖定,認樣能力超強,配合美顏功能可以幫你白滑肌膚。
【Story Mode剪輯電影效果】
Osmo Pocket的玩法多多,唔單止可調校跟隨的靈敏快慢,亦能設定雲台為FPV模式,即使360度轉都依然跟得到,加上內置慢動作、延時攝影、全景拍照功能,玩出多種專業拍攝效果。Osmo Pocket的機身設有一個萬用接口,跟機附有Lightning、USB Type-C接頭,畀你駁住手機,用家可以透過《DJI Mimo》手機App操控,除了玩到剛才提到的功能,最特別是備有Story Mode玩出電影效果,將幾段短片以不同的過場、擺鏡、轉動鏡頭手法,並加入背景音樂,自動剪輯為一條約10秒影片,畀你即時Share上網,就算唔識剪片,都可以變成大師級作品。
【擴充配件豐富】
Osmo Pocket的配件非常豐富,例如具備電子操控的延長杆、充電收納盒、控制撥輪配件等,從而擴充機身的功能和操控性。由於Osmo Pocket本身並不支援藍牙及Wi-Fi功能,因此可額外選購無線連接模組,透過無線技術連接手機,假如大家熱愛玩水的話,亦能夠加裝防水外殼,支援60米水深,無論去沙灘玩水、抑或深潛都冇問題。