3大日本平價眼鏡品牌　入手攻略

對於當正日本係自己「鄉下」，一年去幾次，又有戴開眼鏡嘅讀者，應該實會發現遍布日本全國各地都有好多大型眼鏡連鎖店，可能因為每一間眼鏡店裝潢都好類似嘅關係，驟眼睇你未必會發現其實當中係有幾個唔同品牌，其中JINS、OWNDAYS及Zoff就係日本三大最人氣的平價眼鏡品牌（你當係眼鏡界Uniqlo、Zara同H&M），於去年至今，三個走親民路線的眼鏡品牌都相繼進駐香港開分店（溫馨提示：日本買點都係平啲），想平平哋入副「日本架」（有部分款式真係Made in Japan）就要認住呢三個名。

【Zoff　30分鐘配鏡】

去年11月率先來港搶飲頭啖湯，開設首間香港分店的Zoff，1993年開始經營眼鏡銷售業務，2001年首間眼鏡店於下北開設，於十多年間迅速於日本全國擴張，以大型眼鏡連鎖店形式營運過百間分店，日本定價大約JPY$5,000至JPY$12,000，而且已經包埋1.55折射率球面鏡片（近視800度、遠視及散光200度以上配1.6或以上折射率非球面鏡片需加錢），其後更陸續進軍上海及新加坡，來港剛剛一年，現時亦已經共有5間分店（太古城、九龍灣、馬鞍山、屯門及旺角），香港鏡架定價則由HK$480去到HK$1,480，整個流程與日本店大同小異，揀架、驗眼去到配鏡大約30分鐘完成，唯一唔同係你唔使驚唔識日文同店員溝通唔到。Zoff於香港第6間分店亦即將於本月在將軍澳開幕，擴張速度快過便利店，因為Zoff於香港的合作夥伴利亞零售，就正是大型連鎖便利店及餅店母公司，所以你可以預期Zoff分店會陸續有嚟啦！

【OWNDAYS　全球一年保養】

今年7月首度進駐香港開店的OWNDAYS，1989年已經於日本經營眼鏡業務，去到2008年由現任社長田中修治以個人第三者身份注資購入股權成為大股東後，就帶領因巨額債務瀕臨破產邊緣的OWNDAYS重回正軌，於日本國內有過百間專門店，2013年更陸續擴展至新加坡、菲律賓、泰國、越南、馬來西亞、台灣及中國等地，香港現時亦已經有6間分店（屯門、將軍澳、元朗、旺角、荃灣及尖沙咀）。OWNDAYS除了有大量定價親民的鏡架之外，店內更有推出採用賽璐珞（Celluloid）物料及日本製的高質鏡架，而且全線鏡架不論平貴款式均係配上1.60折射率非球面鏡片（無須加錢），而且更有全球一年保養，香港定價由HK$480至$1,280，日本則由JPY$2,980至JPY$14,980（配Essilor或Seiko 1.74 折射率非球面鏡片），最快20分鐘完成配鏡，去旅行食完碗拉麵就攞得，相當方便。

【JINS　定價貼近日本】

1988年於日本群馬縣成立的JINS，於2001年於天神店開設首間門市至今，單計日本國內已經有接近300間分店，全球各地更坐擁500間分店。今年9月品牌更先後於觀塘及沙田開設兩間香港分店，雖然比起Zoff及OWNDAYS兩位同樣主打平價眼鏡的同鄉攻港時間稍為遲一點，但於香港定價比起前兩者就更親民，平均售價係HK$399至HK$1,099，相當貼近日本定價JPY$5,000至JPY$12,000，但香港價錢只係附送1.6折射率非球面鏡片（要再薄鏡片就要加錢），而喺日本買係連Hoya 1.74 折射率非球面鏡片，可能有人會驚喺日本唔識日文難溝通，但個人經驗係JINS日本門市差不多間間都有最少一個中國留學生店員，基本上用國語都可以溝通，但如果想喺日本JINS入手眼鏡就要留意番，如果近視度數較深或者想做防藍光鏡片等等，都唔可以30分鐘取鏡，一般都要5至7天先可以取貨，記得要自己好好調整行程。