渾濁空氣保命神器　AIRINUM 2.0 Mask

雖然香港唔似內地某啲城市受到霧霾嚴重影響，但以市區空氣質素計都絕對唔算得上係好，加上大時大節四圍都人多擠迫就更加苦不堪言，所以出入戴番個口罩其實都唔係話懶有型，而係有實際需要。瑞典品牌AIRINUM所推出的口罩除了剪裁設計貼合面部之外，其高效能濾芯更可以更換，唔似一般市面買到非白即黑的一次性口罩，用完即扔唔環保，而外層亦經過Polygiene處理，阻止細菌增生及減少異味。

今季品牌就推出全新AIRINUM 2.0口罩，其透氣性及舒適感都有所提升，同時品牌亦特別邀請「罩不離口」的挪威音樂製作人Alan Walker聯名合作，將其如同Zig Zag圖案的「AW」標誌加載於口罩之上，低調有型切合佢一貫個人風格。如果嚟緊除夕夜預咗出街同人逼的話，我勸大家都入手番個，戴咗有唔有型唔敢講，但至少逼沙甸魚時有啖乾淨空氣吸吓！