本日日本:咁得意?多啦A夢成班老友變咗食玩

20190305
東網電視
更多新聞短片
Bandai於昨日推出的COO’NUTS Doraemon食玩系列,一套16款,包辦了動畫中多位人氣角色,當中就連世修(下排左二)及技蘭(下排左三)都有份!(互聯網)
多啦A夢最新電影《大雄的月球探測記》日本啱啱上畫,而香港要到暑假先有得喺戲院睇,真係等到頸都長,與此同時日本呢期亦推出了不少跟食有關的多啦A夢玩意及花臣,而且手工及造型趣致,認真恨死隔籬!其中首推要入貨的,是玩具商Bandai於昨日推出的COO’NUTS Doraemon食玩系列,簡單講該玩意係一個高約4.3cm的迷你不倒翁,今次的Doraemon系列共有16款,包括有多啦A夢、多啦美、大雄、靜香、小夫、胖虎、技蘭及世修8位角色,造型方面包括了戴有竹蜻蜓及攞出隨意門等道具的多啦A夢及多啦美,而其他角色則各有不同表情,當中最特別的,應該係對大雄「鹹濕」行為發怒的靜香!呢款食玩現於日本的超市及便利店發售,各售200日圓。
--------------------------
日本老麥有多啦開心樂園餐
電影《大雄的月球探測記》播放中,假如你想買入該電影的相關玩具,就不妨到日本麥當勞幫襯,事關當地老麥會於3月8日起會推出以《大》電影為概念的開心樂園餐,有多達8款玩具(另加一款神秘玩具),注目作有電影中登場的角色月兔(ムービット),及多啦A夢駕駛的兔車(ウサギカート)玩具,加上還有竹蜻蜓及隨意門等化身而成的玩意,算是OK吸引!要留意該系列的開心樂園餐會於3月8日至21日推出第1彈(其中4款),於3月22日至4月4日推出第2彈(其餘5款),而4月5日起則會9款同時見街,而神秘玩具要在第2彈先會登場。留意這款開心樂園的盒子會採用了多啦A夢跟月兔的Design,而於3月9日及10日幫襯的話更會附送填色紙,有買趁手了。每份售460日圓起。
---------------------------
Aeon有多啦芝士撻
芝士撻又關多啦A夢事?答案係Yes!即日起於日本的Aeon門市冷凍甜品售賣場可以搵到多啦A夢撻(Doraemon Tart),這款甜品於上個月月底才登場,賣點係撻面特別加上了印有6款多啦A夢圖案的透明膠片,而當中圖案的共通點是,多啦A夢都係伸晒脷,流露出一副好滋味的表情,感覺當堂加晒分!而芝士撻的直徑為85毫米,除了撻皮鬆脆,芝士味亦夠濃郁,粉絲們有冇興趣試味?售價各店不同。